नेपाल राष्ट्र बैंकले एटिएम मसिनबाट एक सय रुपैयाँको नोट पनि निकाल्न सकिने व्यवस्था गर्न वाणिज्य बैंकहरुलाई निर्देशन दिएको छ। राष्ट्र बैंकको मुद्रा व्यवस्थापन विभागले नेपाल बैंकर्स संघलाई पत्राचार गर्दै यस्तो निर्देशन दिएको हो।
हाल बैंक तथा वित्तीय संस्थाहरुले ATM Machine हरुबाट रु. १,०००/- र रु.५०० दरका नोटहरु मात्र वितरण गर्दै आईरहेका छन् । ग्राहक वर्गहरुबाट रु. १०० दरका नोटहरु पनि ATM Machine बाट वितरण गर्नुपर्ने माग बेला-बेलामा आउने गरेको र नजिकिंदै गरेको महान् चाँड बडादशैँको उपलक्ष्यमा रु.१००।- दरका नोटहरु पनि ATM Machine वाट वितरण गर्न सकिएमा बैंक तथा वित्तीय संस्थाहरुमा पनि साना दरका नोट साट्ने ग्राहकहरुको भीड उल्लेख्य रुपमा कम हुने आँकलन गर्दै राष्ट्र बैंकले यस्तो निर्देशन दिएको हो ।
राष्ट्र बैंकले केही बैंकहरुसँग मौखिक जानकारी लिँदा प्राविधिक रुपमा सो व्यवस्था गर्न सकिने समेत जानकारी प्राप्त भएको पनि जनाएको छ । राष्ट्र बैंकले आम सर्वसाधारण ग्राहकहरुको सुविधा एवं चाडपर्वको समयमा बैंकहरुमा हुने भीड व्यवस्थापनलाई ध्यानमा राखी ATM Machine बाट रु १००/- दरका नोटहरु पनि वितरण गर्ने व्यवस्था मिलाई सहयोग गरिदिन बैंकर्स संघलाई पत्राचार गरेको हो।
