दिगो ग्रुप र घाम पावरबीच इटहरीस्थित दिगो चार्जपोइन्टमा सोलार ऊर्जामा आधारित ब्याट्री ऊर्जा स्टोरेज प्रणाली (Battery Energy Storage System – BESS) विकास गर्न रणनीतिक टर्म शीटमा हस्ताक्षर भएको छ। यो सहकार्य नेपाललाई स्वच्छ, भरपर्दो र दिगो ऊर्जा पूर्वाधारतर्फ अग्रसर गराउने अर्को महत्वपूर्ण कदमका रूपमा लिइएको छ।
दिगोका अनुसार यस साझेदारीअन्तर्गत सोलार ऊर्जा उत्पादनलाई अत्याधुनिक ब्याट्री ऊर्जा स्टोरेज प्रविधिसँग एकीकृत गरी विद्युतीय सवारीसाधन (EV) चार्जिङ पूर्वाधारलाई अझ प्रभावकारी बनाइनेछ। साथै, उच्च विद्युत् माग हुने समयमा पावर ग्रिडको निर्भरता कम गर्दै स्वच्छ ऊर्जाको उपयोग बढाइने लक्ष्य राखिएको छ।प्रस्तावित ब्याट्री ऊर्जा स्टोरेज प्रणालीले दिनभर सोलार प्रणालीबाट उत्पादन भएको अतिरिक्त विद्युत् सञ्चय गरी आवश्यकताको समयमा विद्युतीय सवारीसाधन चार्ज गर्न प्रयोग गर्नेछ। यस एकीकृत प्रणालीले ऊर्जा आपूर्तिको विश्वसनीयता बढाउनुका साथै विद्युत्को प्रभावकारी उपयोग सुनिश्चित गर्ने र चार्जिङ सञ्चालनमा नवीकरणीय ऊर्जाको प्रयोगलाई थप विस्तार गर्ने अपेक्षा गरिएको छ।
यस सहकार्यबारे दिगोका एकीकृत ऊर्जा समाधानका व्यवसाय प्रमुख नविन अधिकारीले भने “घाम पावरसँगको यो सहकार्य नेपालमा दिगो विद्युतीय सवारीसाधन इकोसिस्टम निर्माण गर्ने हाम्रो अभियानको अर्को महत्वपूर्ण उपलब्धि हो। हाम्रो चार्जिङ स्टेशनहरूमा सौर्य ऊर्जा र ब्याट्री भण्डारण प्रणालीलाई एकीकृत गरेर हामी विद्युतीय यातायातको भविष्यलाई अझ स्मार्ट, स्वच्छ र भरपर्दो बनाउने पूर्वाधार निर्माण गरिरहेका छौं।”
त्यसैगरी, घाम पावरका प्राविधिक निर्देशक प्रदिप हुमागाईंले भने, “यस परियोजनामा दिगोसँग सहकार्य गर्न पाउँदा हामी उत्साहित छौं। सौर्य ऊर्जा र ब्याट्री स्टोरेज प्रणालीको संयोजनले ऊर्जा दक्षता अभिवृद्धि गर्नुका साथै स्वच्छ प्रविधिमार्फत नेपालमा विद्युतीय सवारीसाधन चार्जिङ पूर्वाधारलाई अझ सुदृढ बनाउन महत्वपूर्ण योगदान पुर्याउने विश्वास लिएका छौं।”
यो परियोजना भविष्यमा नेपालभर स्थापना हुने सफा ऊर्जामा आधारित विद्युतीय सवारीसाधन चार्जिङ केन्द्रहरूका लागि एउटा नमुना परियोजनाका रूपमा स्थापित हुने अपेक्षा गरिएको छ। स्थानीय रूपमा उत्पादन भएको सौर्य ऊर्जा र स्मार्ट ऊर्जा भण्डारण प्रणालीको प्रयोगले कार्बन उत्सर्जन घटाउनुका साथै विद्युत् प्रणालीको स्थायित्व बढाउने, सञ्चालन खर्च घटाउने तथा विद्युतीय सवारीसाधन प्रयोगकर्तालाई अविरल चार्जिङ सेवा उपलब्ध गराउन सहयोग पुर्याउनेछ।
दिगोले विद्युतीय सवारीसाधन, चार्जिङ पूर्वाधार तथा दिगो यातायात समाधानमार्फत नेपालमा विद्युतीय यातायातको विस्तारमा अग्रणी भूमिका निर्वाह गर्दै आएको छ। त्यस्तै, घाम पावर नेपालका अग्रणी ऊर्जा कम्पनीहरूमध्ये एक हो, जसले सोलार ऊर्जा समाधानमार्फत देशभर स्वच्छ ऊर्जा प्रवर्द्धनमा महत्वपूर्ण योगदान पुर्याउँदै आएको छ। दुवै संस्थाले ऊर्जा र विद्युतीय यातायातलाई एकीकृत गर्दै नेपाललाई स्वच्छ, स्मार्ट र दिगो ऊर्जा भविष्यतर्फ अग्रसर गराउने तथा शून्य कार्बन उत्सर्जन (Net Zero Emission) को लक्ष्य प्राप्तिमा महत्वपूर्ण योगदान पुर्याउने साझा प्रतिबद्धता व्यक्त गरेका छन्।
