अर्थमन्त्री डा. स्वर्णिम वाग्ले तीन दिने भारत भ्रमण सकेर स्वदेश फर्किएका छन् । बिहीबार छ सदस्यीय नेपाली प्रतिनिधिमण्डलको नेतृत्व गर्दै औपचारिक भारत भ्रमणमा गएका अर्थमन्त्री डा. वाग्ले आज स्वदेश फर्किएका हुन् ।
भारत भ्रमणका क्रममा उनले मन्त्रीस्तरीय दुई भेटवार्ता, एक कूटनीतिक, एक सामाजिक, एक आर्थिक–व्यावसायिक र एक प्राज्ञिक मञ्चमा प्रमुख अतिथिका रूपमा सहभागी भएका थिए ।
भ्रमणका क्रममा रसुवा बाढीपछिको उद्धार र राहतमा भारत सरकारले पुर्याएको सहयोगप्रति सरकारका तर्फबाट भारत सरकारलाई धन्यवाद ज्ञापन गरिएको अर्थमन्त्री डा. वाग्लेले बताए ।
साथै, बाढीपछिको पुनर्निर्माणमा भारतसँग थप सहयोग र सहकार्यको प्रस्ताव गरिएको र दुई देशबीचको राजनीतिक, आर्थिक तथा कूटनीतिक सहकार्यलाई नयाँ ढङ्गबाट अघि बढाउने विषयमा पनि भेटघाट फलदायी भएको उनको भनाइ छ ।
