वैदेशिक रोजगारी सम्बन्धि ठगीको आरोपमा नेपाली कांग्रेसका महाधिवेशन प्रतिनिधि भरत चौलागाईं पक्राउ परेका छन् । प्रहरीको केन्द्रीय अनुसन्धान ब्यूरो (सीआईबी)का अनुसार प्रधानमन्त्रीको प्रमुख सल्लाहकार नाम लिएर उनले विदेश पठाइदिने भन्दै व्यक्तिहरुलाई ठगी गरेका थिए ।
नेपालबाट इजरायलमा केयर गिभरको लागि कामदार लैजाने भनी नेपाल सरकार र इजरायल सरकारबीच भएको जीटुजी सम्झौताबमोजिम छनौटमा नपरेका मानिसहरुलाई पावर लगाएर पठाइदिने भन्दै चौलागाईंले उनीहरुसँग मोटो रकम असुल गरेका थिए । लक्की ड्रमा नपरेकामध्ये १ सय ५६ जनासँग प्रतिव्यक्ति ६ लाख २० हजार रुपैयाँका दरले कुल २ करोड ५० लाख ठगी गरेको पाइएको सीआईबीले जनाएको छ ।
चौलागाईं रामेछाप जिल्ला सुनापति गाउँपालिका वडा नं १ का स्थायी बासिन्दा हुन् । उनलाई प्रहरीले रामेछापबाटै पक्राउ गरेको हो ।
उनीसँगै दोलखा जिल्ला कालिञ्चोक गाउँपालिका वडा नं ८ घर भएकी पत्रकर बालिका सिवाकोटी पनि पक्राउ परेकी छिन् ।
सीआईबी प्रवक्ता एसएसपी अनुपमसमशेर जबराका अनुसार यस प्रकरणको अनुसन्धान भइरहेको छ ।
