नेकपा माओवादी केन्द्र र नेकपा एकिकृत समाजवादीबीच पार्टी एकता गर्ने अन्तिम चरणको सहमति भएको छ । निर्वाचन आयोगले फागुन २१ गतेका लागि तोकेको निर्वाचनका लागि दल दर्ता गर्न दिएको समयअघि नै दुई पार्टीबीच एकता हुने बताइएको छ ।
अब नेतृत्व र चुनाव चिन्ह मात्रै मिल्न बाँकी छ । नेतृत्वको विषय टुंगो लगाउन माओवादी संयोजक प्रचण्ड र नेकपा एसका अध्यक्ष माधवकुमार नेपाललाई जिम्मा दिइएको छ । नेतृत्वमा दुइ जना अध्यक्ष रहने प्रावधान राख्ने विषयमा छलफल भएपनि दुइ अध्यक्ष राख्दा विगतमा असफल हुनु परेकाले त्यो मोडलमा नजान दूबै पक्ष सहमत भएका छन् । यस आधारमा प्रचण्डलाई संयोजक र माधब नेपाललाई सहसंयोजक तोकेर जान सकिने सम्भावना रहेको बताइएको छ ।
नेताहरुका अनुसार पार्टीको चुनाव चिन्हमा भने सहमति हुन बाँकी छ । माओवादी गोलाकार भित्रको हसिया हथौडा त्याग्न तयार भएपनि नेकपा एसको हाल कायम चुनाव चिन्ह कलम मान्न तयार छैन । नेकपा एसले भने कलमलाई नै चुनाव चिन्ह राखौँ भनेर प्रस्ताव गरिरहेको छ ।
सिद्धान्त र कार्यक्रम टुंगिएको छ । पार्टीको मार्गदर्शक सिद्धान्त मार्क्सवाद लेनिनवाद र कार्यक्रम नेपाली विशेषतासहितको समाजवाद रहनेछ । जस अनुसार अब माओवादी केन्द्रले नामबाटै माओवादी हटाएर मार्गदर्शक सिद्धान्तबाट पनि माओवाद छोड्ने भएको छ ।
एकीकरणपछि बन्ने पार्टीको नाममा सहमति हुन बाँकी भएपनि अब माओवादी भन्ने रहने छैन । स्रोतका अनुसार नेपाल कम्युनिस्ट पार्टी समाजवादी वा नेपाली कम्युनिस्ट पार्टी समाजवादी नाम राख्ने बारे छलफल भइरहेको छ ।
साथै, हाल निर्वाचन आयोगमा दर्ता रहेको नेकपा समाजवादीलाई समेत ल्याएर त्यहीँ नाम राख्ने भन्नेमा पनि छलफल भइरहेको बुझिएको छ ।
