वैदेशिक रोजगार व्यवसायी संघले आफूहरुका माग सम्बोधन नगरिए १५ दिनपछि श्रमिकहरुलाई विदेश नपठाउने चेतावनी दिएको छ । सरकारलाई १५ दिने अल्टिमेटम दिँदै संघले म्यानपावर कम्पनीमाथि गरिएको कारबाही फिर्ता नभए १५ दिनपछि श्रमिकलाई विदेश नपठाउने चेतावनी दिएको हो ।
आयोजित विशेष भेलामा संघका अध्यक्ष डिक बहादुर खत्रीले व्यवहारिक पक्ष नबुझी कारबाहीको डण्डा चलाइएको भन्दै अब व्यवसायी र श्रमिक मिलेर कडा आन्दोलन गर्ने बताएका छन् । भारतीय विमानस्थल हुँदै अन्य मुलुकमा श्रमिक पठाएको भन्दै वैदेशिक रोजगार विभागले ५९८ म्यानपावर कम्पनीलाई कारबाही गरेपछि संघले उक्त कारबाही फिर्ता लिनुपर्ने, व्यवसायीप्रतिको व्यवहार सच्याउनुपर्ने माग गरेको छ ।
संघका अध्यक्ष खत्रीले वैदेशिक रोजगारीको अन्तिम प्रक्रियामा रहेका सबै श्रमिकहरूलाई आगामी १५ दिनभित्र पठाइसक्ने र त्यसपछि कडा आन्दोलनमा उत्रिने चेतावनी दिएका हुन् ।
‘१५ दिनभित्र अन्तिम प्रक्रियामा भएका सबै श्रमिकहरूलाई पठाइसक्नुहोला,’ उनले व्यवसायीहरुलाई भने, ‘हाम्रा माग सम्बोधन नगरे हामी विदेश पठाउँदैनौँ । त्यपछि हामीले आन्दोलन गर्नै पर्दैन । युवाहरुले नै आन्दोलन गर्छन् ।’
