नेपालको स्वच्छ, हरित र भरपर्दो विद्युतलाई क्षेत्रीय बजारमा प्रतिस्पर्धी रूपमा विस्तार गर्ने लक्ष्यसहित ऊर्जा, जलस्रोत तथा सिँचाइमन्त्री विराज भक्त श्रेष्ठको उपस्थितिमा स्वतन्त्र ऊर्जा उत्पादकहरूको संस्था नेपाल (इप्पान)का पदाधिकारीसँग छलफल भएको छ ।
छलफलमा विद्युत व्यापारमा निजी क्षेत्रको सहभागिता, प्रतिस्पर्धी विद्युत बजारको विकास, खुला पहुँच, प्रसारण पूर्वाधारको प्रभावकारी उपयोग तथा क्षेत्रीय ऊर्जा व्यापारका सम्भावनाबारे विस्तृत विचार विमर्श भएको मन्त्री श्रेष्ठको सचिवालयले जनाएको छ ।
मन्त्री श्रेष्ठले नेपाल विद्युत प्राधिकरणसँग समन्वयमा बी टू बी मोडलमार्फत निजी क्षेत्रलाई अन्तर्राष्ट्रिय बजार खोज्न आवश्यक नीतिगत र कानुनी व्यवस्था बनाउन मन्त्रालय सकारात्मक रहेको बताउँदै राज्यको हित, प्राधिकरणको भूमिका र उपभोक्ताको अधिकार सुरक्षित हुने गरी विद्युत व्यापार विस्तार गरिने स्पष्ट पारेका छन् ।
ऊर्जा उत्पादनसँगै व्यापार र बजार विस्तारमा निजी क्षेत्रको अनुभव उपयोग गर्दै नेपाललाई दक्षिण एशियाको स्वच्छ ऊर्जा केन्द्रका रूपमा स्थापित गर्ने तथा ऊर्जा क्षेत्रमार्फत आर्थिक समृद्धिमा योगदान पुर्याउने साझा प्रतिवद्धता छलफलमा व्यक्त गरिएको थियो ।
