नेपाल राष्ट्र बैंकले अब वालेट प्रयोगका लागि पनि राष्ट्रिय परिचयपत्र अनिवार्य गरेको छ ।
भुक्तानी सेवा प्रदायकका लागि केन्द्रीय बैंकले एक निर्देशन जारी गर्दै अब सेवा प्रदायककले राष्ट्रिय परिचयपत्रको विद्युतीय अभिलेख अनुसार विवरण यकिन गरेर मात्रै वालेट खाता खोल्ने व्यवस्था मिलाउन भनेको हो ।
२०८३ असोज मसान्तभित्र मोबाइल एप्लिकेसन वा अन्य उपयुक्त माध्यमबाट वालेट प्रयोगकर्ताको राष्ट्रिय परिचयपत्रको विवरण भए नभएको स्वघोषणा लिन र राष्ट्रिय परिचयपत्र लिएकाको हकमा २०८३ असोज मसान्तभित्र मोबाइल एप्लिकेसन वा अन्य उपयुक्त माध्यमबाट सम्बन्धित वालेट प्रयोगकर्ताको राष्ट्रिय परिचयपत्र नम्बर अद्यावधिक गर्न राष्ट्र बैंकले निर्देशन दिएको हो ।
राष्ट्रिय परिचयपत्र लिई बाँकी प्रयोगकर्तालाई राष्ट्रिय परिचयपत्र लिई ग्राहक पहिचान अद्यावधिक गर्न सेवा प्रदायकले मोबाइल एप्लिकेसन वा अन्य माध्यमबाट प्रत्येक महिना जानकारी दिनुपर्नेछ ।
यसैगरी, विदेशमा रहेका नेपाली नागरिकले विदेशमै बसेर अनलाइन मार्फत विद्युतीय वालेट खोल्नुपर्दा राष्ट्रिय परिचयपत्र बाहेकका अन्य आवश्यक कागजात लिएर पनि वालेट खोल्न सक्ने छन् । तर, नेपाल फर्किएको ३५ दिनभित्र राष्ट्रिय परिचयपत्रको विवरण लिई अद्यावधिक गराउनुपर्नेछ ।
