फागुन २१ गते भएको निर्वाचनको मतपरिणाम आउने क्रम जारी छ । अहिलेसम्म आएका मत परिणाम अनुसार राष्ट्रिय स्वतन्त्र पार्टी (रास्वपा)को रफ्तार निकै बढेको छ ।
हालसम्म अन्तिम मतपरिणाम सार्वजनिक भएका आधारमा केही उद्योगी व्यवसायीहरुले पनि चुनाव जितेका छन् । स्याङ्जा १ बाट डा. जनन्जय रेग्मी निर्वाचित भएका छन् । रास्वपाबाट उम्मेदवार बनेका रेग्मी नेपाल पर्यटन बोर्डका पूर्व सीईओ हुन् ।
बारा ३ बाट निर्वाचित भएका अरविन्द साह खल्ती पेमेन्ट गेट—वे का को–फाउण्डर हुन् । उनी पनि रास्वपाबाटै उम्मेदवार बनेका थिए । अछाम १ बाट निर्वाचित भरत स्वाँर यातायात व्यवसायी हुन् । उनी नेपाली कांग्रेसबाट उम्मेदवार बनेर निर्वाचित भएका हुन् ।
त्यसैगरी भक्तपूर १ बाट निर्वाचित भएका रुकेश रन्जित पनि व्यवसायी हुन् । रास्वपाबाट उम्मेदवार बनेर निर्वाचित भएका उनी भक्तपूर उद्योग वाणिज्य महासंघका महासचिवसमेत थिए ।
यस्तै, रसुवाबाट निर्वाचित मोहन आचार्य निर्माण व्यवसायी हुन् । उनी कांग्रेसबाट उम्मेदवार थिए ।
काभ्रे २ मा निर्वाचन जितेका बदन भण्डारी पनि व्यवसायी हुन् । रास्वपाबाट उम्मेदवार बनेर चुनाव जितेका भण्डारी राष्ट्रिय व्यवसायी महासंघको पूर्व उपमहासचिव हुन् । कैलाली ५ बाट निर्वाचित आनन्द कुमार चन्द पनि शिक्षा क्षेत्रमा लगानी भएका व्यवसायी हुन् । उनी रास्वपाबाट उम्मेदवार थिए ।
त्यसो त, रास्वपाका उपसभापति डीपी अर्याल पनि व्यवसायी हुन् । उनी पनि काठमाडौँ ९ बाट निर्वाचित भइसकेका छन् ।
अझै धेरै स्थानमा मतगणना जारी छ । यसपटकको निर्वाचनमा उद्योगपति विनोद चौधरीदेखि विभिन्न उद्योग व्यवसायमा संलग्न व्यक्तिहरु विभिन्न राजनीतिक दलबाट उम्मेदवार बनेका छन् । नतिजा आउने क्रम जारी नै छ ।
