नेपाल धितोपत्र बोर्डका अध्यक्ष डा. गोपाल प्रसाद भट्टले एक सार्वजनिक कार्यक्रममै २०८३ असोज १५ गतेसम्ममा एउटा मात्रै नभई धेरै वटा कम्पनीलाई धितोपत्र बोर्डले आईपीओ निष्काशनको अनुमति दिने बताएका थिए। तर आज असोज १६ गते हुँदासम्म बोर्डले कुनै पनि कम्पनीलाई आईपीओ अनुमति दिएको छैन ।
यससँगै आम लगानीकर्ताले बोर्ड अध्यक्षमाथि अविश्वास व्यक्त गरेका छन् भने कतिपयले भने बोर्ड अध्यक्षले सार्वजनिक रुपमै अन्तराष्ट्रिय पाहुनाकै अगाडि ढाँटेको अभिव्यक्ति दिन थालेका छन् । त्यस्तो त गत वैशाख २ पछि बोर्डबाट कुनै पनि कम्पनीले आईपीओ अनुमति पाएका छैनन्। यसले आईपीओको प्राथमिक बजार ६ महिनादेखि ठप्प छ।
अब भने बोर्डले आईपीओ निष्काशनको अनुमति दिने भएको छ। बोर्ड स्रोतका अनुसार बोर्ड अध्यक्ष डा. भट्टले आज असोज १६ गते शुक्रबार संचालक समितिको बैठक बोलाएका छन् । सो बैठकबाट निर्णय गराएर बोर्डले आज एउटा हाइड्रोपावर कम्पनीलाई आईपीओ निष्काशनको अनुमति दिने तयारी गरेको स्रोतको भनाई छ। बत्ति बालिसकेको र नेटवर्थ पनि सय रुपैयाँ भन्दा बढी रहेको एउटा हाइड्रोपावर कम्पनीले आज आईपीओ निष्काशनको अनुमति पाउने सम्भावना उच्च रहेको स्रोतको भनाई छ।
