पूर्वी नेपालको पहिलो अन्तर्राष्ट्रिय चेन होटल ब्राण्ड ‘रमडा बाई विन्डहम इटहरी’ले ‘स्वच्छता स्तरीकरण’मा ‘अतिउत्तम’को लोगो र स्टिकर प्राप्त गरेको छ । खाद्य प्रविधि तथा गुण नियन्त्रण कार्यालय विराटनगरले रमडा इटहरीको मुख्य भान्सा, भोजनकक्ष र सेवा प्रणालीलाई निरीक्षण गरेर गुणस्तर जाँच गर्दै अतिउत्तम (तीन तारा) श्रेणीको प्रमाणपत्र र स्टिकर प्रदान गरेको हो ।
कार्यालयका प्रमुख निरीक्षकले होटलमा पुगेर प्रमाणपत्र हस्तान्तरण गर्दै खाद्य सुरक्षा तथा गुणस्तरमा रमाडाले सम्पूर्ण मापदण्ड पूरा गरेको बताए । उनले खाद्य स्वच्छताका आधारमा होटल स्तरीकरण गर्ने निर्देशिका अनुसार होटलले सबै आवश्यक मापदण्ड पूरा गरेकाले अतिउत्तम खाद्य गुणस्तर श्रेणीको प्रमाणपत्र प्रदान गरिएको जानकारी दिए ।
प्रमाणपत्र प्राप्त पश्चात होटल व्यवस्थापनले कार्यालयलाई धन्यवाद दिँदै स्थानीय र विदेशी पाहुनालाई होटलले सधैँ सुरक्षित भोजन र गुणस्तरीय सेवा उपलब्ध गराउने प्रतिवद्धता जनाएका छन् । ‘हामी स्थानीय र विदेशी पाहुनालाई गुणस्तरीय सेवा र सुरक्षित भोजन उपलब्ध गराउन सधैँ प्रतिवद्ध छौँ, खाद्य स्वच्छता स्तरीकरणमा सबै मापदण्ड पूरा गरेर अति उत्तम श्रेणीको प्रमाणपत्र पाउँदा गौरवान्वित भएका छौँ’ होटल व्यवस्थापनले भनेको छ ।
खाद्य स्वच्छता तथा गुणस्तर निरीक्षणका क्रममा कार्यालयले होटलको किचन, भण्डारण, कच्चा पदार्थ गुणस्तर, सुरक्षा उपाय र कर्मचारी प्रशिक्षणजस्ता समग्र पक्षको मूल्यांकन गरेको थियो ।
रमडा बाई विन्डहम इटहरी पूर्वी नेपालमा भित्रिएको पहिलो अन्तर्राष्ट्रिय चेन होटल ब्राण्ड हो । अमेरिकामा मुख्यालय रहेको विन्डहम होटल्स एण्ड रिसोट्र्सको लोकप्रिय ब्रान्ड ‘रमडा बाइ विन्डहम’लाई युवा व्यवसायी देशबन्धु बस्नेत (अजित)ले पहिलोपटक पूर्वी नेपालमा भित्र्याएका हन् ।
रमडा इटहरीमा ८१ वटा आकर्षक कोठाहरु छन् । टेरेस बार, आल डे डाइनिङ रेस्टुरेन्ट, कफी शप, दुईवटा ब्यांक्वेट हल, मिटिङ रुम, आउटडोर लाउन, पूल बार, स्वीमिङ पूल, जिम र साउना लगायतका आधुनिक सुविधाहरु होटलमा उपलब्ध छन् ।
व्यावसायिक बैठकदेखि बिबाह तथा सामाजिक कार्यका लागि उपर्युक्त यस होटलले पूर्वी नेपाललाई विश्व बजारसँग जोड्ने अपेक्षा गरिएको छ ।
