नेपाल बीमा प्राधिकरणको अध्यक्ष बन्नको लागि ५० जनाले आवेदन दिएका छन्। आवेदन दिने अन्तिम दिन आज जेठ १९ गतेको कार्यालय समयसम्म ५० जनाले आवेदन दिएका हुन् ।
बीमा प्राधिकरण कै बहालवाला कर्मचारी, बीमा विज्ञ, नेपाल राष्ट्र बैंकबाट अवकाशप्राप्त र बहालवाला कर्मचारी, बीमा कम्पनी कै पूर्व सीइओ लगायतले आवेदन दिएको बताईएको छ ।
यस पटक सरकारले फरक तरिकाबाट नेपाल बीमा प्राधिकरणको अध्यक्ष नियुक्त गर्दै छ । प्राधिकरणको अध्यक्षको लागि नाम सिफारिस गर्न गठित सिफारिस समितिले जेठ १३ गते सार्वजनिक सूचना जारी गरेको थियो।
यस अघि प्राधिकरण अध्यक्ष नियुक्तिको लागि आवेदन दिँदा व्यवसायिक कार्ययोजना पनि पेश गर्नु पर्थ्यो भने सर्टलिस्टमा परेकाहरुले त्यसको प्रस्तुतिकरण समेत गर्नु पर्ने व्यवस्था हुने गरेको थियो । यस पटक भने सिफारिस समितिले व्यक्तिगत विवरण (CV) र स्वघोषणा फारम मात्र बुझाउन भनेको थियो।
यस अघि धितोपत्र बोर्डको अध्यक्ष पनि यसैगरि सिफारिस गरिएको थियो । तर नियुक्ति भने हुन सकेको छैन ।
शरद ओझालाई सरकारले बर्खास्त गरेपछि बीमा प्राधिकरणमा नयाँ अध्यक्ष नियुक्ति हुन लागेको हो ।
