पूर्व अर्थमन्त्री डा. प्रकाश शरण महतले नेपाल विद्युत प्राधिकरणले धेरै लोभ नगरेर जलविद्युत आयोजना निर्माणको जिम्मा निजी क्षेत्रलाई दिनु पर्ने बताएका छन्। इकोनोमिक मिडिया सोसाइटी नेपाल (इम्सन) ले आयोजना गरेको ‘बजेट अ होलिस्टीक डिस्कोर्स’मा बोल्दै उनले यस्तो बताएका हुन् ।
विद्युत प्राधिकरणले अब आफुले आयोजना बनाउनु नहुने र प्राधिकरणले अध्ययन गरेका आयोजना पनि निजी क्षेत्रलाई बनाउन दिनु पर्ने बताए। अहिले प्राधिकरणले बनाएका आयोजना पनि संचालनको लागि निजी क्षेत्रलाई दिने सकिने उनको भनाई थियो। निजी क्षेत्रले जलविद्युत आयोजना निर्माण र संचालन प्राधिकरणको भन्दा राम्रो गर्ने उनले उल्लेख गरे।
डा. महतले नेपाल एयरलायन्सको बहुमत शेयर पनि निजी क्षेत्रलाई दिनु पर्ने बताए। नेपाल एयरलाइन्स राम्रोसँग चल्न नसकेकोले उसको पुरै शेयर नै निजी क्षेत्रलाई दिए हुने उनको टिप्पणी थियो।
