सिन्धुपाल्चोकस्थित तातोपानी नाका सञ्चालनमा आउने सम्भावना बढेको छ । चिनियाँ पक्षले भदौ १५ गतेबाट कुनै कारण नखुलाई बन्द गरिदिएको नाका अब भने पुनः सञ्चालनमा आउने सम्भावना बढेको हो ।
तातोपानी भन्सार कार्यालयका भन्सार अधिकृत तुल बहादुर पाण्डेका अनुसार चिनियाँ पक्षले नाका सञ्चालनका लागि अनुमति प्राप्त भएको भन्ने सम्मको जानकारी नेपाली पक्षलाई दिएको छ । तर, कुन मितिबाट नाका सञ्चालन हुन्छ भन्ने जानकारी भने अझै पनि आइसकेको छैन ।
‘उनीहरुको हाइअर अथोरिटीबाट यो नाका सञ्चालनको अनुमति प्राप्त आएको छ भन्ने जानकारी हामीलाई दिइएको छ, अब खुल्छ होला’ उनले भने, ‘तर, यो मितिबाट सञ्चालनमा आउँछ भन्ने जानकारी चाहिँ छैन ।’
उनका अनुसार नाका सञ्चालनमा आउँदा काम गर्नका लागि नेपाल पक्ष तयारी अवस्थामा छ । भन्सार कार्यालयदेखि सडकसमेत तयारी अवस्थामा रहेको उनको भनाइ छ । ‘हामी तयारी अवस्थामा छौँ, हाम्रो तर्फ बाटो पनि डिस्टर्ब छैन’ पाण्डेले भने, ‘अब चाँडै खुल्छ होला ।’
तातोपानी नाका बन्द हुँदा दशैँ तिहारका लागि नेपाली व्यवसायीहरुले चीनबाट मगाएका सामानहरु रोकिएका थिए । भदौको बाढीले रसुवागढी नाका क्षतिग्रस्त बनाएपछि चीनबाट हुने आयातका लागि मुस्ताङको कोरला नाकालाई वैकल्पिक नाकाका रुपमा सञ्चालनमा ल्याइएको छ । तर, अहिले असोजको बाढीका कारण ठाउँठाउँमा बाटो अवरुद्द भएका कारण उक्त नाकाबाट आयात भएका सामान नाका आसपासमै रोकिएका छन् ।
जसका कारण हिमालय सीमापार वाणिज्य संघले तातोपानी नाका सञ्चालनका लागि पहल गर्न सरकारको ध्यानाकर्षण गराउँदै आएको छ ।
