गोरखाको चुमनुब्री गाउँपालिका क्षेत्रमा भीषा बाढी आएको छ । बूढीगण्डकी नदीमा लेदो र गेग्रानसहितको आकस्मिक बाढी आएका कारण तल्लो तटीय क्षेत्रमा जोखिम बढाएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी निर्देशक डा. धर्मराज उप्रेतीका अनुसार बाढीको प्रभावबाट तल्लो तटीय क्षेत्रलाई जोगाउन सुरक्षा निकायलाई खटाइएको छ ।
बाढी कसरी आयो र यसले के कस्तो क्षति गर्दै बगिरहेको छ भन्नेबारे कुनै जानकारी आइसकेको छैन । तर, चितवनसम्मै बाढीको जोखिम देखिएकाले सतर्कता अपनाउन अनुरोध गरिएको छ । आसपासका बासिन्दालाई एसएमएस अलर्ट पठाइसकिएको प्राधिकरणले जनाएको छ ।
स्थानीय सर्ती खोलाबाट सुरु भएको बाढीको प्रभाव सिर्दिबास, जगत, यारु, तातोपानी, माछाखोला, सोती, आरुखेत र आरुघाटसम्म पर्न सक्ने देखिएको छ । त्यसपछि बाढी त्रिशूली नदीमा मिसिने भएकाले तल्लो तटीय क्षेत्रसम्म सतर्कता आवश्यक देखिएको प्राधिकरणको भनाइ छ ।
