नेपालीको महान् पर्व बडादशैँ आजबाट सुरु भएको छ । हरेक वर्ष आश्विन शुक्ल प्रतिपदादेखि विधिवत् सुरु हुने दशैँ आजबाट सुरु भएको हो ।
बडादशैँको पहिलो दिन आज घरघरमा विधिपूर्वक दियो, कलश र गणेश स्थापनासहित घटस्थापना गरिन्छ ।
आज बिहानै नित्यकर्म समाप्त गरी नजिकको नदी वा चोखो स्थलबाट बालुवा वा माटो ल्याई गाईको गोबरले लिपपोत गरिएको पूजा कोठा अथवा दशैँ घरमा विधिपूर्वक राखेर त्यसमाथि यव अर्थात् जौँ रोप्ने गरिन्छ । यो कर्मलाई जमरा राख्ने पनि भनिन्छ ।
आज विधिपूर्वक घट अर्थात् घडा स्थापना गरी घडामाथि शक्तिस्वरुपा दुर्गाको पूजा आराधना गरिने भएकाले आजको दिनलाई घटस्थापना भन्ने गरिएको हो । आज स्थापना गरिएको पूर्ण कलशको जलले अभिषेक गरी विजयादशमीका दिन दुर्गा देवीको प्रसाद ग्रहण गर्ने गरिन्छ ।
आज घटस्थापनाको साइत बिहान ११ः४७ बजे रहेको पञ्चाङ्ग निर्णायक समितिले जनाएको छ ।
यस वर्ष दशैँको टीकाको उत्तम साइत कात्तिक ४ गते १०ः२६ बजे रहेको छ । दशमीदेखि कोजाग्रत पूर्णिमाका दिनसम्म देवीको प्रसादस्वरुप टीका लगाइने शास्त्रीय विधि छ ।
