जलविद्युत् तथा पूर्वाधार विकास क्षेत्रमा १६ वर्षभन्दा बढीको अनुभव हासिल गरेका इन्जिनियर लोक राज जोशी सूर्यकुण्ड हाइड्रो इलेक्ट्रिक लिमिटेडको स्वतन्त्र सञ्चालक पदमा निर्विरोध निर्वाचित भएका छन्। जलविद्युत् आयोजना विकास, वित्तीय व्यवस्थापन, निर्माण, कमिसनिङ तथा सञ्चालनमा लामो अनुभव हासिल गरेका जोशीको सञ्चालक पदमा भएको चयनलाई कम्पनीको रणनीतिक नेतृत्व र संस्थागत सुशासनका दृष्टिले महत्त्वपूर्ण रूपमा हेरिएको छ।
सिभिल इन्जिनियरिङमा स्नातक (BE in Civil Engineering), इन्जिनियरिङमा स्नातकोत्तर, समाजशास्त्रमा स्नातकोत्तर (MA in Sociology) तथा करार कानुनमा कानुन स्नातक (LLB in Contract Law) गरेका जोशीको शैक्षिक पृष्ठभूमि प्राविधिक ज्ञान, सामाजिक बुझाइ तथा कानुनी पक्षको समन्वित संयोजन हो। उनको बहुआयामिक शैक्षिक योग्यता र व्यावसायिक अनुभवले जलविद्युत् तथा पूर्वाधार क्षेत्रका जटिल प्राविधिक, वित्तीय, करारसम्बन्धी र संस्थागत विषयहरूको विश्लेषण तथा व्यवस्थापनमा विशेष आधार प्रदान गरेको छ।
जोशीले आफ्नो व्यावसायिक यात्राका क्रममा वरिष्ठ व्यवस्थापन तथा नेतृत्व तहमा रहेर कुल १६४.४ मेगावाट क्षमताका जलविद्युत् आयोजना व्यावसायिक सञ्चालनमा ल्याउने कार्यमा योगदान पुर्याएका छन्। साथै, थप ५०० मेगावाटभन्दा बढी क्षमताका जलविद्युत् आयोजनाको विकास प्रक्रियालाई अघि बढाउन उनी संलग्न रहेका छन्। कठिन भौगर्भिक अवस्था, भूमिगत संरचनामा अत्यधिक पानी प्रवेश, चट्टान खुम्चिने समस्या, दुर्गम भौगोलिक परिवेश, राजनीतिक संक्रमण तथा कोभिड–१९ महामारीबाट सिर्जित चुनौतीपूर्ण परिस्थितिमा आयोजना व्यवस्थापन र कार्यान्वयनको अनुभवले उनलाई नेपालको जलविद्युत् क्षेत्रका व्यावहारिक चुनौती र सम्भावनाबारे गहिरो ज्ञान प्रदान गरेको छ।
अन्तर्राष्ट्रिय विकास वित्तीय संस्था, वाणिज्य बैंक, लगानीकर्ता, निर्माण व्यवसायी तथा नियामक निकायहरूसँगको सहकार्यमा प्राप्त अनुभवले उनको वित्तीय संरचना निर्माण, लगानी परिचालन, जोखिम व्यवस्थापन, करार प्रशासन तथा संस्थागत समन्वयसम्बन्धी क्षमतालाई थप सुदृढ बनाएको छ।
हाल उनी अमेरिकाको संयुक्त राज्य अमेरिका र सिंगापुरको समर्थनमा सञ्चालित प्रत्यक्ष वैदेशिक लगानी (FDI) आधारित लगानी तथा विकास मञ्चमार्फत नेपालको ऊर्जा तथा पूर्वाधार क्षेत्रमा दीर्घकालीन स्वदेशी तथा अन्तर्राष्ट्रिय पुँजी परिचालन गर्ने कार्यमा केन्द्रित छन्। नेपालको जलविद्युत् तथा पूर्वाधार विकासलाई गति दिन नीतिगत सुधार, स्थिर नियामकीय वातावरण, प्रभावकारी पुँजी बजार र लगानीमैत्री संस्थागत संरचना आवश्यक रहेको उनको दृष्टिकोण छ।
कम्पनीको सञ्चालक समितिमा अध्यक्षका रूपमा सञ्जीव न्यौपाने रहेका छन् भने द्वारिका न्यौपाने, सिर्जना खड्का र सुषान्त तिमिल्सिना पनि सञ्चालक समितिमा निर्वाचित भएका छन्।
