निरन्तरको वर्षाका कारण देशका विभिन्न स्थानमा पहिरो खस्दा महत्वपूर्ण राजमार्ग अवरुद्द भएका छन् । राजधानी काठमाडौँ प्रवेश गर्ने मुख्य राजमार्ग नै अवरुद्द हुँदा यात्रुबाहक र मालबाहक गाडीहरु काठमाडौँमै रोकिएका छन् ।
अहिले पृथ्वी राजमार्ग, बीपी राजमार्ग, नारायणगढ–मुग्लिन सडकखण्ड र कान्तिलोकपथ बन्द भएका छन् । जसका कारण काठमाडौँ भित्रिने र बाहिरिने यात्रुहरु प्रभावित भएका छन् । कलंकी र बल्खु क्षेत्रमा अहिले मालबाहक र यात्रुबाहक गाडीहरु रोकेर राखिएको छ ।
यसैबीच अत्यावश्यक खाद्यान्न र इन्धन ढुवानीका लागि त्रिभुवन राजपथलाई वैकल्पिक सडकका रुपमा चलाइएको छ । हेटौंडा–भीमफेदी–नौबिसे–काठमाडौं जोडिने त्रिभुवन राजपथ एकतर्फी सञ्चालनमा ल्याइएको छ । यो बाटो भएर काठमाडौँ भित्रिने सवारी साधनलाई मात्रै चल्न दिइएको छ, काठमाडौँबाट बाहिरिने सवारी साधन चल्न दिइएको छैन । काठमाडौँ उपत्यकामा अत्यावश्यक सामग्री भित्र्याउन सहज होस् भनेर यो सडकलाई एकतर्फी सञ्चालनमा राखिएको बताइएको छ ।
साना सवारीसाधनका लागि हेटौंडा–भीमफेदी–कुलेखानी–फाखेल–फर्पिङ तथा कुलेखानी–सिस्नेरी–फर्पिङ सडक सञ्चालनमा नै रहेको छ । यद्यपी, कुलेखानीको ड्याम भरिन लागेको भन्दै ठाउँ ठाउँमा साइरन राखिएको छ । यसकारण यो मार्गबाट पनि यात्रा भने सहज छैन ।
