लगातारको अविरल वर्षाका कारण फोहोरो व्यवस्थापनमा पनि समस्या भएको छ । काठमाडौँ महानगरका अनुसार फोहर ढुवानी गर्ने सडक र ल्यान्डफिल साइटमा माथिबाट लेदोसहितको माटो खसिरहेको हुँदा फोहर ढुवानी तथा विसर्जन गर्ने कार्यमा असहजता उत्पन्न भएको हो।
यस विषम परिस्थितिका कारण केही समयका लागि फोहर संकलन तथा ढुवानी कार्य प्रभावित हुन सक्ने भएकाले काठमाडौं महानगरपालिकाको वातावरण व्यवस्थापन विभागले महानगरवासी, घरधनी, व्यवसायी तथा सम्बद्ध सबैलाई फोहोरलाई घर भित्रै राख्न विशेष अनुरोध गरेको छ।
महानगरले सबैलाई आफ्नो घर, पसल, व्यवसाय तथा कम्पाउण्डबाट निस्कने फोहर सडक, चोक, सार्वजनिक स्थल, खोला–नाला वा अन्य खुला स्थानमा नफाल्न आग्रह गरेको हो। फोहर संकलन नियमित हुन नसक्ने अवधिसम्म सम्भव भएसम्म फोहर सुरक्षित रूपमा आफ्नै घर/परिसरभित्र राख्न महानगरले भनेको छ।
फोहरलाई सड्ने/जैविक र नसड्ने फोहर छुट्याई सुरक्षित रूपमा व्यवस्थापन गर्न महानगरले आग्रह गरेको छ। सडक तथा सार्वजनिक स्थानमा फोहर फाल्दा सडक अवरुद्ध हुनुका साथै वर्षाको पानीको निकासमा समेत बाधा पुग्ने भएकाले विशेष सावधानी अपनाउन महानगरले भनेको छ।
विभागले जनाएअनुसार वर्षा तथा ल्यान्डफिल साइटको अवस्था सामान्य हुनासाथ फोहर संकलन तथा ढुवानी सेवा नियमित रूपमा सुचारु गरिनेछ।
