शनिबार अपरान्हको भिषण वर्षाका कारण अवरुद्ध भएको बिपी राजमार्ग खुलाउन समय लाग्ने भएको छ । आइतबार पनि पानी परिरहेको र शनिबारै धेरै स्थानमा डाइभर्सन बगाएकाले राजमार्ग अहिलेसम्म पूर्णरुपमा अवरुद्ध छ ।
शनिबार दिउँसो ४ बजेबाट बन्द रहेको राजमार्ग खुलाउन अझै समय लाग्ने काभ्रे प्रहरीले जनाएको छ । इलाका प्रहरी कार्यालय मंगलटारका प्रमुख प्रहरी निरीक्षक ईश्वर कार्कीका अनुसार आइतबार साँझसम्म पनि सडक खुलाउन नसकिने स्थित छ ।
रोशी खोलाको बाढीले चौकीडाँडा, घुमाउने, चारसय बेँसी, गिम्दी बेँसी, नार्के, चिउरीबास, बोक्सीकुना, कालढुंगा, डालाबेशी, ठुलोढुंगा तथा माम्तीमा डाइभर्सन बगाएको छ । सिन्धुलीतर्फ आँपघारी क्षेत्रमा पनि डाइभर्सन बगाएको छ ।
बाटो अवरुद्ध भएपनि काभ्रेको मङ्गलटार, भकुण्डे बेसी, काभ्रेभञ्ज्याङ र धुलिखेल तथा सिन्धुलीको नेपालथोक र खुर्कोटमा सवारी साधनलाई ‘होल्ड’ गरिएको छ । आइतबार बिहानबाट भकुण्डे, काभ्रेभञ्ज्याङ र धुलिखेलमा रोकिएका सवारी साधनहरुलाई सुरक्षित स्थानमा पठाइएको छ ।
