राष्ट्रिय परीक्षा बोर्डले माध्यमिक शिक्षा परीक्षा (एसइई)को नतिजा बैशाख महिनामै सार्वजनिक गर्ने भएको छ । बोर्डले बैशाख महिनाको अन्तिम सातासम्म नतिजा सार्वजनिक गर्ने तयारी गरेको हो ।
बोर्डका अनुसार उत्तरपुस्तिका परीक्षणको काम लगभग सकिएको छ र अहिले परीक्षार्थीको प्राप्ताङ्क कम्प्युटरमा प्रविष्ट गर्ने काम भइरहेको छ ।
विगतमा तीन महिनाभित्र नतिजा सार्वजनिक गरिँदै आएको भएपनि यस वर्ष भने करिब एक महिनामै नतिजा निकाल्न लागिएको हो । यसपटक उत्तरपुस्तिका परीक्षा केन्द्रमै परीक्षण गरिएको थियो ।
एसइई परीक्षा चैत १८ गतेदेखि २९ गतेसम्म सञ्चालन भएको थियो, जसमा देशभरबाट पाँच लाख १२ हजार ४२१ विद्यार्थी सहभागी भएका थिए ।
