चाडपर्व लक्षित यात्रु सहायता कक्ष सञ्चालनमा आएको छ । ‘सुरक्षित सडक र सवारी, हामी सबैको जिम्मेवारी’ नारासहित नयाँबसपार्कमा यात्रु सहायता कक्ष स्थापना गरिएको हो ।
काठमाडौं उपत्यका प्रहरी कार्यालयका प्रमुख एवम् प्रहरी अतिरिक्त महानिरीक्षक सुशीलसिंह राठौरले नयाँबसपार्कमा स्थापना भएको यात्रु सहायता कक्षको उद्घाटन गरेका छन् ।
दशैँ, तिहार तथा छठ पर्वका अवसरमा काठमांडौं उपत्यकाबाट बाहिरिने यात्रुहरूको सुरक्षित, व्यवस्थित र सहज यात्राका लागि यातायात व्यवस्था विभाग, ट्राफिक प्रहरी, सामुदायिक प्रहरी, यातायात व्यवसायीको संयुक्त पहलमा यात्रु सहायता कक्षको स्थापना गरिएको हो ।
अब माछापोखरी, टोखा, तीनपिप्ले, भिमढुङगा, नाङ्लेभार, कलंकी, बल्खु, नागढुङ्गा, कोटेश्वर, चावहिल, फर्पिङ, साँखु, चापागाउँ र जगातीमा पनि यात्रु सहायता कक्ष स्थापना गरिनेछ ।
