सवारी साधन चलाउन सिकाउने ड्राइभिङ सेन्टरहरुले अचाक्ली महँगो शुल्क लिने र नवीकरण फेल भएका सवारी प्रयोग गर्ने गरेको विषय सार्वजनिक भएपछि अनुसन्धानका लागि रोकिएको लाइसेन्स परीक्षाको फाराम आजबाट खुलेको छ ।
यसअघि राष्ट्रिय सतर्कता केन्द्रले समेत चासो दिएर अनुसन्धान गर्दै ड्राइभिङ सेन्टरहरुको गुणस्तरीयता र त्यहाँ प्रयोग हुने सवारी साधनहरु ठिक छन् भन्ने प्रमाणित नभएसम्म ट्रायल परीक्षा बन्द गरेको थियो । सतर्कता केन्द्रले काठमाडौँ उपत्यकामा संचालित ४ वटा ट्रायल सेन्टरको स्थलगत अध्ययन गरी मापदण्ड पूरा नभएको भन्दै ट्रायल रोक्न निर्देशन दिएको थियो । जसकारण जेठ पहिलोसातादेखि ट्रायल परीक्षा बन्द भएको थियो ।
सतर्कता केन्द्रको निर्देशन प्रदेश सरकारको श्रम, रोजगार तथा यातायात मन्त्रालयले मापदण्ड अनुरुप नचलेका ट्रायल सेन्टरलाई मापदण्ड अनुसारको बनाउने बताएको थियो । अहिले ट्रायल सेन्टरहरूले केन्द्रले भने अनुसार सुधार गरेपछि पुनः सेवा सञ्चालन गर्न बागमती प्रदेशको श्रम, रोजगार तथा यातायात मन्त्रालयले यातायात व्यवस्था कार्यालयहरु भक्तपुर, चाबहिल, गुर्जुधारा र ठूलोभर्याङलाई पत्रचार गरेको हो ।
यसअघि राष्ट्रिय सतर्कता केन्द्रले जेठ ३ गते भक्तपुरको इजी वे ट्रायल सेन्टर, गुर्जुधाराको भेइकल एकेडेमी एण्ड रिसर्च सेन्टर, गोकर्णेश्वरको नेपाल ड्राइभिङ एन्ड रिकन्डिसन सेन्टर प्रा.लि. र एकान्तकुनाको सुजुकी ड्राइभिङ स्कुलमा ट्रायल परीक्षा बन्द गरेको थियो । ती ट्रायल सेन्टरहरूले सवारीचालक प्रशिक्षण केन्द्र सञ्चालन निर्देशिका २०७४ ले तोकेको मापदण्डअनुसार परीक्षा नलिएको केन्द्रले बताएको थियो ।
