फागुन २१ गतेको लागि तोकिएको प्रतिनिधिसभा निर्वाचन भन्दा अगाडिको अन्तिम शेयर कारोबारमा आज शेयरबजार परिसूचक नेप्से दोहोरो अंकले बढेको छ । आज नेप्से सूचक ३८.५२ अंकले बढेर २७१२.४९ को बिन्दुमा पुगेर रोकिएको छ । यसले चुनाव अघि लगानीकर्ता कन्फिडेन्ट देखिएको संकेत गरेको छ।
आज कारोबारमा आएका ३२९ कम्पनीका १ करोड ५१ लाख ८४ हजार ६ सय ७ कित्ता शेयर खरिद बिक्रीबाट ६ अर्ब २३ करोड ४३ लाख ८१ हजार रुपैयाँको कारोबार भएको छ। जस मध्ये आँखु खोला हाइड्रोको सर्वाधिक ३४ करोड ६५ लाखको कारोबार भएको छ रिडी पावरको २७ करोड ७४ लाखको कारोबार भएको छ।
आज कारोबारमा आएका मध्ये सालपा विकास बैंकको शेयर मूल्य ९.९९ प्रतिशत बढेको छ भने पन्चकन्या माई हाइड्रोको शेयर मूल्य ९.८९ प्रतिशत बढेको छ। त्यस्तै रिलायन्स स्पिनिङ्ग मिल्सको शेयर मूल्य ९.८२ प्रतिशत बढेको छ। कारोबारमा आएका मध्ये शुभम पावरको शेयर मूल्य सर्वाधिक २.५३ प्रतिशतले घटेको छ।
आज कारोबारमा आएका ट्रेडिङ बाहेकका समुहगत उपसूचक बढेका छन् । जस मध्ये हाइड्रो समूह सर्वाधिक २.१३ प्रतिशत बढेको छ।
भोलि फागुन २० गतेबाट सरकारले ३ दिन चुनावको लागि सार्वजनिक विदा दिएकोले चुनाव अघिको अन्तिम शेयर कारोवार आज फागुन १९ गते भएको हो । सरकारले चुनाव हुने अघिल्लो दिन फागुन २०, चुनाव हुने दिन फागुन २१ र चुनावको भोलिपल्ट फागुन २२ गते सार्वजनिक विदा दिएको छ। ति दिनमा शेयर कारोबार हुने छैन । त्यस्तै फागुन २३ गते शनिवार परेको छ भने फागुन २४ गते अन्तराष्ट्रिय महिला श्रमिक दिवसको सार्वजनिक विदा रहेको छ।
अब फागुन २५ गतेमात्र शेयरबजार खुला हुनेछ। सो दिनसम्म चुनावको प्रारम्भिक परिणाम आईसक्ने आँकलन गरिएको छ।
