अख्तियार दुरुपयोग अनुसन्धान आयोगले नेपाल धितोपत्र बोर्डमा छापा मारेको छ। आज दिउँसो अख्तियारको टोलीले बोर्डको खुमलटार स्थित कार्यालयमा छापा मारेको हो।
नेपाल धितोपत्र बोर्डका अध्यक्षको नाम लिंदै आईपीओ निष्काशन अनुमतिको लागि भन्दै केही व्यक्तिले कमिशन मागेको विषय बाहिर आएपछि अख्तियारले छापा मारेको हो । स्रोतका अनुसार अख्तियारको उपसचिवको नेतृत्वको ३ सदस्यीय टोली दिउँसो बोर्डको कार्यालय पुगेको थियो।
टोलीले बोर्डका अध्यक्ष सन्तोष नारायण श्रेष्ठ, बोर्डका नियमन विभागका प्रमुख रहेका कार्यकारी निर्देशक मुक्तिनाथ श्रेष्ठ, उपकार्यकारी निर्देशक निरन्जय घिमिरे, उप कार्यकारी अधिकृत अम्बिका प्रसाद गिरी, निर्देशक शंकर रिमाल र तोलाकान्त न्यौपानेसँग ४ घण्टा बिताएको स्रोतले जनाएको छ। त्यस क्रममा टोलीले आईपीओको लागि आवेदन परेपछि अनुमति दिंदासम्मको चरणका प्रक्रियाहरुबारे प्रश्न गरेको थियो । त्यस्तै आवश्यक कागजातहरु बारेको विवरण पनि अख्तियारको टोलीले बुझेको छ। अख्तियारको टोलीले आईपीओ निष्काशनको क्रममा रहेका कम्पनीहरुको कागजातको विवरण पनि नियन्त्रणमा लिएको गएको छ। अख्तियारको टोली ३/४ बजे मात्र फर्किएको बताईएको छ।
केही हाइड्रोपावरका संचालकहरुले आईपीओ निष्काशनको लागि अनुमति चाहिने भए कमिशन दिनु पर्ने भन्दै आफुहरुलाई प्रस्ताव आएको बताएका थिए। हाइड्रोका संचालकहरुले ५ देखि ७ प्रतिशतसम्म कमिशन मागेको बताएका थिए। यसबारे अख्तियारमा पनि उजुरी परेको थियो। कमिशनको विषय बाहिर आएपछि अख्तियारले बोर्डमा छापा मारेको हो ।
धितोपत्र बोर्डका अध्यक्ष सन्तोष नारायण श्रेष्ठले भने आरोप कपोकल्पित भएको भन्दै आरोप पुष्टि गर्न चुनौती दिएका छन् ।
