यस पटक फरक तरिकाबाट नेपाल बीमा प्राधिकरणको अध्यक्ष नियुक्त हुने भएको छ । प्राधिकरणको अध्यक्षको लागि नाम सिफारिस गर्न गठित सिफारिस समितिले आज आज जेठ १३ गते सार्वजनिक सूचना जारी गरेको छ।
समितिले नेपाल नेपाल बीमा प्राधिकरणको रिक्त अध्यक्ष पद पूर्तिको लागि नाम सिफारिस गर्नुपर्ने भएकोले ७ दिन भित्र अर्थात् जेठ १९ गते भित्र योग्य तथा इच्छुकहरुलाई व्यक्तिगत विवरण पेश गर्न भनेको छ । अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखा, सिंहदरवार, काठमाडौंमा अवस्थित समितिको सचिवालयमा व्यक्तिगत विवरण पेश गर्न भनिएको छ।
यस अघि प्राधिकरण अध्यक्ष नियुक्तिको लागि आवेदन दिँदा व्यवसायिक कार्ययोजना पनि पेश गर्नु पर्थ्यो भने सर्टलिस्टमा परेकाहरुले त्यसको प्रस्तुतिकरण समेत गर्नु पर्ने व्यवस्था हुने गरेको थियो । यस पटक भने सिफारिस समितिले व्यक्तिगत विवरण (CV) र स्वघोषणा फारम मात्र बुझाउन भनेको छ ।
यस संगै सिफारिस समितिले प्राप्त आवेदनको आधारमा उम्मेदवारहरुमध्ये ३ जनालाई सिधै अध्यक्ष नियुक्तिको लागि सिफारिस गर्ने छ । यस अघि धितोपत्र बोर्डको अध्यक्ष पनि यसैगरि सिफारिस गरिएको थियो । तर नियुक्ति भने हुन सकेको छैन ।
शरद ओझालाई सरकारले बर्खास्त गरेपछि बीमा प्राधिकरणमा नयाँ अध्यक्ष नियुक्ति हुन लागेको हो ।
