सरकारले विद्युत विकास विभागको महानिर्देशक परिवर्तन गर्न लागेको चर्चा ऊर्जा क्षेत्रमा चलेको छ । ऊर्जा, जलस्रोत तथा सिँचाइ मन्त्री विराजभक्त श्रेष्ठले यसै साता नै मन्त्रीस्तरीय निर्णय गरेर विभागमा नयाँ महानिर्देशक पठाउन लागेको चर्चा मन्त्रालयदेखि विभागसम्मै छ ।
हाल विभागको महानिर्देशकमा मनदेवी श्रेष्ठ छिन् । उनी २०८२ असोजमा विभागको महानिर्देशक नियुक्त भएकी थिईन् । तत्कालीन ऊर्जा मन्त्री कुलमान घिसिङले श्रेष्ठलाई विभागको महानिर्देशकको रुपमा नियुक्त गरेका थिए। श्रेष्ठ विभागको पहिलो महिला महानिर्देशक समेत हुन् । अब भने उर्जामन्त्री विराजभक्त श्रेष्ठले मनदेवी श्रेष्ठलाई अन्यन्त्र पठाएर विभागमा नयाँ महानिर्देशक नियुक्त गर्न लागेको बताईएको छ।
नयाँ महानिर्देशकको लागि हाल उर्जा मन्त्रालयका सहसचिव रहेका सागरराज गौतमको नाम अत्याधिक चर्चामा छ। गौतम हाल मन्त्रालयको विकास सहायता तथा प्रादेशिक समन्वय महाशाखा प्रमुख छन् । गौतम २०८० माघमा सहसचिवमा बढुवा भएका थिए ।
गौतम विद्युत नियमन आयोगको अध्यक्ष र सदस्य सिफारिस गर्न गठित समितिको सदस्य पनि थिए। विराज भक्त श्रेष्ठ मन्त्री भएपछि सहसचिव सागरराज गौतम कै नेतृत्वमा पेन्डिङ पीपीए तथा अनुमतिपत्र १८० दिनभित्र टुंग्याउने समिति गठन भएको थियो। सो समितिले विद्युत खरिद सम्झौता (पीपीए) गरी लामो समयसम्म शून्य प्रगतिमा रहेका १ हजार ३८८ मेगावाट क्षमताका ३८ वटा जलविद्युत आयोजनाको अनुमति रद्द गर्न सिफारिस गरेको थियो । उनी नेतृत्व कै समितिले लाईसेन्स रद्दसम्मको सिफारिस गरेको र सो कार्यान्वयन विभाग मार्फत हुने भएकोले त्यसको जिम्मा उनलाई नै दिन उपयुक्त हुने भएकोले पनि विभागमा मन्त्रीले गौतमलाई पठाउन खोजेको बताईन्छ । मन्त्री श्रेष्ठ आएपछि गौतमले विभिन्न थप जिम्मेवारी पाएकोले पनि गौतमलाई मन्त्री श्रेष्ठको विश्वासपात्रको रुपमा हेरिएको छ ।
यदि वरिष्ठ सहसचिवलाई बनाईएमा भने जीवछ मण्डल पनि महानिर्देशक बन्न सक्ने चर्चा छ। मण्डल यस अघि दुई पटक विभागको महानिर्देशक भईसकेका छन् । मनदेवी श्रेष्ठ आउनु अघि मण्डल नै विभागको महानिर्देशक थिए। हाल भने मण्डल जल तथा ऊर्जा आयोगको सचिवालयमा छन् । उनी आयोगको प्रवक्ताको जिम्मेवारीमा छन् । मण्डल सिनियर सहसचिव हुन् । उनी २०७१ मा सहसचिवमा बढुवा भएका थिए। उनी निकटका अनुसार सरकारले सहसचिव बढुवा नियमित रुपमा गरेको भए उनी सचिवको लागि सिफारिस भईसकेका हुन्थे ।
