आन्तरिक राजस्व विभागले २०८३ असार महिनाको विद्युत खपतमा मूल्य अभिवृद्धि कर (भ्याट) नलाग्ने प्रष्ट पारेको छ । विद्युत प्राधिकरणले असारको खपतमै भ्याट जोडर बिल पठाएपछि यस सम्बन्धमा अन्योल सिर्जना भएको थियो ।
तर, विभागले सूचना जारी गर्दै साउन १ गतेअघिको खपतमा आर्थिक ऐन, २०८३ अनुसार भ्याट नलाग्ने प्रष्ट पारेको हो । विभागले असारको खपतको बिल साउन १ गते वा त्यो भन्दा पछाडी प्राप्त भएपनि उपभोक्तालाई भ्याट नलाग्ने स्पष्ट पारेको छ ।
विभागले साउन १ गतेदेखिको खपतमा भने न्यूनतम शुल्क वा डिमान्ड चार्जमा भ्याट लाग्ने जनाएको छ ।
आर्थिक ऐन, २०८३ ले मूल्य अभिवृद्धि कर ऐन, २०५२ लाई संशोधन गर्दै विद्युत् सेवा प्रदान गर्ने व्यक्तिले अन्तिम उपभोक्तालाई ५ प्रतिशत र अन्य उपभोक्ताको हकमा १३ प्रतिशत भ्याट लाग्ने व्यवस्था गरेको छ ।
विद्युत् प्राधिकरणले असारमै खपत गरेको बिजुलीको बिलमा भ्याट जोडेर ग्राहकलाई पठाएको थियो ।
