नेपालमा ‘एकोर ग्रुप’को सहकार्यमा बन्दै गरेको पहिलो होटल ‘मक्र्युर काठमाडौँ’को महाप्रबन्धकमा विजय नान्मारन नियुक्त भएका छन् । उनलाई होटलका सञ्चालक देशबन्धु बस्नेत (अजित)ले महाप्रबन्धकमा नियुक्त भएसँगै स्वागत गरेका छन् ।
विश्व प्रसिद्ध एकोर ग्रुपसँगको सहकार्यमा ‘दी मेट्रोपोलिटन होटल प्रा.लि.’ले काठमाडौँको सुकेधारामा पाँचतारे होटल निर्माण गर्दैछ । निर्माणाधीन होटल ‘मक्र्युर काठामाडौँ’ ब्राण्ड नामबाट सञ्चालनमा आउने भएको हो ।
विजय नान्मारनको अनुभव र रणनीतिक कौशलताले मक्र्युर काठमाडौँमा असाधारण आतिथ्य सेवा प्रदान गर्न र होटल र उपभोक्ताबीच बलियो सम्बन्ध बढाउन मद्दत पुग्ने विश्वास होटल परिवारले लिएको छ ।
‘मक्र्युर काठमाडौँ’ पाँचतारे होटल हो । जसमा ११० कोठा हुनेछन् ।
मक्र्युर होटलहरू जुन जुन देशमा, जहाँजहाँ सञ्चालनमा छन्, ति प्रत्येक स्थानको संस्कृति र स्थानीय कला र परिकार सहितका उच्च गुणस्तरीय सेवाका लागि प्रख्यात छन् । मक्र्युरले विभिन्न ६५ देशमा ९६० होटलहरुको व्यवस्थापन सम्हाल्दै आएको छ । सँगै, १० हजार बढी रेष्टुरेन्ट तथा बारको पनि व्यवस्थापन गर्दै आएको छ ।
‘एकोर’सँग होटल ब्राण्ड मात्रै ४० भन्दा बढी छन् । यी मध्ये ‘मक्र्युर’लाई नेपालमा देशबन्धु बस्नेतले भित्र्याएका हुन् । एकोर ग्रुप युरोपको विश्वबिख्यात बिजनेश ग्रुप हो ।
