आन्तरिक राजस्व विभागले आर्थिक वर्ष सुरु नहुँदै (असार महिना) को विद्युत खपतमा मूल्य अभिवृद्धि कर (भ्याट) नलाग्ने प्रष्ट पारेपछि अब भ्याटसहित महशुल तिरिसकेका उपभोक्ताको हकमा के हुन्छ भन्ने प्रश्न उब्जेको छ ।
नेपाल विद्युत प्राधिकरणले असारकै विद्युत खपतमा मूल्य अभिवृद्धि कर (भ्याट) जोडेर बिल पठाएपछि सिर्जना भएको अन्योलतालाई चिर्दै आन्तरिक राजस्व विभागले २०८३ असार महिनाको विद्युत खपतमा भ्याट नलाग्ने प्रष्ट पारिसकेको छ । तर, असारमा खपत भएको बिजुलीको बिल साउन ५ गतेपछि पठाएको प्राधिकरणले भ्याट जोडेको थियो । यस विषयमा उपभोक्ताले प्राप्त गरेको बिलसहित बिजनेशपाना लगायतका मिडियाले समाचार प्रकाशन गरेका थिए ।
भ्याटको नियम नयाँ आर्थिक वर्षको बिलबाट सुरु हुनुपर्ने भएपनि प्राधिकरणले भने असारकै बिलमा पनि भ्याट लिएको थियो । तर, विभागले साउन ११ गते सूचना जारी गर्दै साउन १ गतेअघिको विद्युत खपतमा आर्थिक ऐन, २०८३ अनुसार भ्याट नलाग्ने प्रष्ट पारेको हो । विभागले असारको खपतको बिल साउन १ गते वा त्यो भन्दा पछाडी पठाएपनि प्राधिकरणले उपभोक्तालाई भ्याट जोड्न नपाउने भनेको छ ।
त्र, विभागले साउन १ गतेदेखिको खपतमा भने न्यूनतम शुल्क वा डिमान्ड चार्जमा भ्याट लाग्ने जनाएको छ । आर्थिक ऐन, २०८३ ले मूल्य अभिवृद्धि कर ऐन, २०५२ लाई संशोधन गर्दै विद्युत् सेवा प्रदान गर्ने व्यक्तिले अन्तिम उपभोक्तालाई ५ प्रतिशत र अन्य उपभोक्ताको हकमा १३ प्रतिशत भ्याट लाग्ने व्यवस्था गरेको छ ।
भ्याट तिरिसकेका उपभोक्ताको हकमा के हुन्छ ?
प्राधिकरणले असारकै बिलमा भ्याट जोडेर पठाएपछि महशुल तिरिसकेका उपभोक्ताले अब आगामी महिनाको बिलमा समायोजन हुनेछ । प्राधिकरणले सोमबार राती एक सूचना जारी गर्दै भ्याट तिरिसकेका उपभोक्ताको हकमा अब साउन महिनाको विद्युत खपतबापत भदौमा काटिने बिलमा समायोजन गरिने जनाएको छ ।
प्राधिकरणले यसअिघ असार मसान्तसम्म खपत भएको बिजुलीको बिल साउनमा जारी गर्दा भ्याटसहित जारी भएको र अब साउनमा खपत भएको बिजुलीको बिल भदौमा जारी हुने र त्यतिबेला अहिले तिरिएको भ्याट समायोजन गरिने जनाएको हो ।
