नेपालमा SML ISUZU ब्राण्डका कमर्शियल सवारी साधनहरूको एकमात्र वितरक लक्ष्मी कमर्शियल भेहिकल्स प्रा.लि. र रिलायन्स फाइनान्सबीच साझेदारी गर्ने हस्ताक्षर भएको छ ।
कमर्शियल सवारी साधन किन्न चाहने ग्राहकहरूका लागि सुविधाजनक वित्तीय समाधान प्रदान गर्ने उद्देश्यले रणनीतिक साझेदारीपत्रमा हस्ताक्षर भएको हो ।
यस समझदारीपत्रको मुख्य उद्देश्य SML ISUZU ब्राण्डका ट्रक, टिपर, सार्वजनिक बस, स्कूल बस र विशेष उद्देश्यका सवारी साधनहरूमा सुविधाजनक वित्तीय समाधान उपलब्ध गराउने रहेको बताइएको छ । ग्राहकको प्रारम्भिक छनोट लक्ष्मी कमर्शियल भेहिकल्सका वितरक र डिलरहरूले गर्नेछन् र नजिकको रिलायन्स फाइनान्सको शाखाबाट अधिकतम ५ वर्ष अवधिको मासिक किस्ता प्रणालीमा ऋण सेवा उपलब्ध हुनेछ ।
लक्ष्मी कमर्शियल भेहिकल्सले गुणस्तरीय, भरपर्दो र नेपाली सडक तथा व्यवसायिक आवश्यकताअनुकूल सवारी साधन उपलब्ध गराउँदै आएको छ। कम्पनीले आफ्नो 3S (बिक्री, सेवा, स्पेयर पार्ट्स) प्रणालीका लागि मुख्य कार्यालय गुर्जुधारा, काठमाडौंमा स्थापना गर्दै ७ वटा प्रदेश तथा सबै ठूला शहरमा सेवा उपलब्ध गराउँदै आएको छ।
समझौतामा रिलायन्स फाइनान्सका प्रमुख कार्यकारी अधिकृत समाज प्रकाश श्रेष्ठ र लक्ष्मी कमर्शियल भेहिकल्सका प्रबन्धक जितेन्द्र लाल कर्णले हस्ताक्षर गरेका छन् ।
यस साझेदारीले लक्ष्मी कमर्शियल भेहिकल्सलाई SML ISUZU ब्राण्डमार्फत नेपालभर व्यवसायिक सवारी साधन क्षेत्रमा अझ मजबुत उपस्थिति विस्तार गर्न र ग्राहकको व्यवसायिक यात्रामा भरोसायोग्य सहयोग पुर्याउन सक्षम बनाउने विश्वास लिइएको छ ।
