नेपाल राष्ट्र बैंकमा दुई जना कार्यकारी निर्देशकको पद रिक्त भएको छ। राष्ट्र बैंकमा १८ जना कार्यकारी निर्देशक रहने व्यवस्था रहेकोमा हाल १६ जना मात्र कार्यकारी निर्देशक रहेका छन् ।
हिजो मात्र सरकारले कार्यकारी निर्देशक रहेका किरण पण्डितलाई डेपुटी गभर्नर नियुक्त गरेको छ। यस संगै उनको कार्यकारी निर्देशक पद रिक्त भएको हो । त्यस्तै केही दिन अघि मात्र उमेर हदको कारण कार्यकारी निर्देशक रोशन सिग्देलले अनिवार्य अवकाश पाएका छन् । सो संगै उनी रहेको कार्यकारी निर्देशक पद पनि रिक्त भएको हो।
हाल राष्ट्र बैंकको वैदेशिक मुद्रा व्यवस्थापन विभाग र बैंकिंग विभागमा कार्यकारी निर्देशक पद रिक्त भएको हो । अब राष्ट्र बैंकले निर्देशकहरु मध्येबाट दुई जनालाई कार्यकारी निर्देशकमा बढुवा गर्ने छ। जसमा पहिलो वरियतामा रहेका निर्देशकद्वय हेम प्रसाद न्यौपाने र मुक्तिनाथ सापकोटाको बढुवा हुने सम्भावना छ। उनीहरुको बढुवापछि राष्ट्र बैंकले अन्य कार्यकारी निर्देशकहरुको पनि सरुवा गर्न सक्ने छ।
हिजो सरकारले एक जना डेपुटी गर्भनर मात्र नियुक्त गरेको छ । राष्ट्र बैंकमा एझई एक डेपुटी गभर्नरको पद रिक्त छ। सरकारले कार्यकारी निर्देशकहरु मध्येबाट थप एक जनालाई डेपुटी गभर्नर नियुक्त गरेपछि अर्को एक कार्यकारी निर्देशकको पद पनि रिक्त हुने छ।
