उद्योगपति विनोद चौधरीले सामाजिक सञ्जालमा आफ्नो नाम र तस्बिरको प्रयोग गरेर विभिन्न स्क्याम लिंक तथा भ्रामक सामग्रीहरू सार्वजनिक भइरहेकोप्रति आफ्नो गम्भीर ध्यानाकर्षण भएको जनाएका छन् । नेपालका एकमात्र डलर अर्बपति चौधरीले यस विषयमा आफूले यसअघि पनि सामाजिक सञ्जालमार्फत जानकारी गराउनुका साथै नेपाल प्रहरीको साइबर ब्यूरोसमक्ष पनि आवश्यक कारबाहीका लागि आग्रह गर्दै आएको उल्लेख गरेका छन् ।
तर पनि यस्ता भ्रामक पोष्ट सामाजिक सन्जालमा आउने क्रम जारी रहेको भन्दै उनले आफ्नो नाममा लगानी योजना, रकम स्थानान्तरण वा आर्थिक कारोबारसम्बन्धी प्रकाशित र प्रशारित सामग्री तथा लिंकहरु भ्रामक भएको प्रष्ट पारेका छन् ।
‘मेरो नाम वा तस्बिर प्रयोग गरिएका अपरिचित लिंकमा क्लिक नगर्नुहोस्, व्यक्तिगत विवरण उपलब्ध नगराउनुहोस् र कुनै पनि आर्थिक कारोबार गर्नुअघि त्यसको आधिकारिकता सुनिश्चित गर्नुहोस्’ उनले लेखेका छन्, ‘यस्ता गतिविधिहरू भेटिएमा सम्बन्धित सरकारी निकायमा जानकारी गराउनुका साथै आवश्यक सावधानी अपनाउनुहुन अनुरोध गर्दछु ।’
