नेपालभरी वर्षा गराइरहेको मौसमी प्रणाली आइतबार रातीबाट क्रमशः कमजोर हुँदै जाने मौसमविद्ले अनुमान गरेका छन् । अहिले भारतको उत्तर प्रदेश आसपास रहेको न्यूनचापीय क्षेत्र कमजोर हुँदै गएसँगै नेपालमा वर्षाको गतिविधि पनि क्रमशः कम हुँदै जानेछ ।
नेपाल मौसम विज्ञान विभागको मौसम पूर्वानुमान महाशाखाका मौसमविद् सञ्जीव अधिकारीका अनुसार आइतबार दिनभरी देशका एकाध स्थानमा भारी वर्षा हुने र धेरै स्थानमा सामान्य वर्षा हुने पूर्वानुमान छ । उनका अनुसार अहिले लुम्बिनी र सुदूरपश्चिम प्रदेशको दक्षिणतर्फ वर्षा बढी भइरहेको छ ।
अहिले न्यूनचापीय प्रणाली विस्तारै कमजोर भइसकेको र त्यसको थोरै मात्र प्रभाव बाँकी रहेकाले अब रातीबाट क्रमशः पानी पर्न कम हुनेछ ।
साथै, भारतको उत्तर प्रदेशमा रहेको न्यूनचापीय क्षेत्रसँगै बंगालको खाडीबाट जलवाष्पयुक्त हावा नेपालतर्फ आइरहेकाले मधेश, बागमती र कोशी प्रदेशको पश्चिमी भूभागमा वर्षा हुने सम्भावना छ ।
आज दिउँसो सुदूरपश्चिम प्रदेशका हिमाल, पहाड र तराईका धेरै स्थानमा मध्यम वर्षा हुने सम्भावना छ । कोशी प्रदेशको पूर्वी भूभागमा भने तुलनात्मक रूपमा कम वर्षा हुने अनुमान छ । रातीदेखि भने मौसममा क्रमशः सुधार आउने अपेक्षा गरिएको छ ।
