निप्पोन फर्मास्युटिकल लिमिटेडले आईपीओ निष्काशन गर्ने भएको छ । कोशी प्रदेश, मोरङ्ग जिल्ला, बिराटनगर म.न.पा वडा नं. १२ बखरीमा अवस्थित यस कम्पनीले आईपीओ निष्काशनको लागि नबिल इन्भेष्टमेण्ट बैंकिङ्गलाई बिक्री प्रबन्धक चयन गरेको छ।
सो सम्झौता पत्रमा निप्पोन फर्मास्युटिकल लिमिटेडको तर्फबाट कम्पनीका प्रबन्ध निर्देशक मन्टु घिमिरे तथा नबिल इन्भेष्टमेन्ट बैंकिङ्ग लिमिटेडका तर्फबाट प्रमुख कार्यकारी अधिकृत मनिष नारायण जोशीले हस्ताक्षर गरेका छन् ।
निप्पोन फर्मास्युटिकल लिमिटेड WHO-GMP र अन्तर्राष्ट्रिय गुणस्तर मापदण्डहरु अनुरुप विभिन्न प्रकारका औषधीहरु जस्तै ट्यावलेट, क्याप्सुल, तरल औषधी, मलम, क्रीम जेल, ओआरएस (ORS), ड्राइ सिरप र पेनिसिलिन लगायतका उत्पादन गर्ने फर्मास्युटिकल कम्पनी हो। कम्पनीको दर्ता २००६ मा भई उद्योग स्थापना २०१७ मा भएको हो।
यस कम्पनीले औषधी तथा अषौधिजन्य उत्पादन पोर्टफोलियोको विकास र निर्माण गरेर नेपाली फर्माबजारलाई सम्बोधन गरिरहेको छ । स्थापना भएको ५ वर्ष पछि अर्थात् २०२२ देखि आफ्नो व्यावसायिक उत्पादन र मार्केटिङ्ग सुरु गरेको निप्पोन फर्मास्युटिकलले स्थापनाको ४ वर्षमा विभिन्न थेराप्युटिक सेगमेन्टका ६० भन्दा बढी उत्पादनहरुको बजारीकरण गर्न सक्षम भएको छ ।
