काठमाडौँ उपत्यकामा शुक्रबारदेखि खाना पकाउने एलपी ग्यास पूरानै मूल्यमा उपलब्ध हुने भएको छ । नेपाल एलपी ग्यास उद्योग संघले पृथ्वी राजमार्ग अवरुद्द हुनुभन्दा अगाडिकै मूल्य अर्थात् प्रतिसिलिन्डर २ हजार ६० रुपैयाँ कायम गरेर ग्यास बेच्न आफ्ना सदस्यहरुलाई सूचना जारी गरेको छ ।
यसअघि संघले कृष्णभीरमा पहिरो जाँदा पृथ्वी राजमार्ग अवरुद्द भएपछि वैकल्पिक बाटो प्रयोग गरेर ग्यास ल्याउँदा ढुवानी खर्च बढेको भन्दै निगमले तोकेको प्रतिसिलिन्डर २ हजार ६० रुपैयाँमा ढुवानी बापत बढेको १६५ रुपैयाँ ३८ पैसासम्म जोडेर ग्यास बेच्न आफ्ना सदस्यहरुलाई अनुरोध गरेको थियो । तर, अहिले राजमार्ग सञ्चालनमा आएपछि अतिरिक्त ढुवानी खर्च हटेको हो ।
संघले शुक्रबारबाट अतिरिक्त ढुवानी बापत यसअघि तोकिएको १६५ रुपैयाँ हटाउन भनेको हो । योसँगै अब शुक्रबारबाट काठमाडौँमा प्रतिसिलिन्डर २ हजार ६० रुपैयाँमा नै ग्यास पाइनेछ ।
