नुवाकोटमा आज दुर्घटनाग्रस्त एयर डाईनेस्टीको 9N- AJD हेलिकप्टर दुर्घटनाबारे छानबिन गर्न सरकार जाँचबुझ आयोग गठन गरेको छ। आज बसेको मन्त्रिपरिषद्को आकष्मिक बैठकले आयोग गठन गरेको हो ।
आयोगको संयोजकत्वमा नेपाली सेनाका वरिष्ठ पाइलट सुवास थापा रहेका छन् भने अन्य दुई सदस्यमा सिम्रिक एयरका मेन्टेनेन्स म्यानेजर विष्णु बस्नेत र एरोनोटिकल इन्जिनियर तनुजा पोखरेल सदस्य छन् । आयोगलाई प्रतिवेदन पेश गर्न काम सुरु गरेको मितिले ३० दिनको समय दिइएको छ।
नुवाकोटमा आज दुर्घटनाग्रस्त एयर डाईनेस्टीको 9N- AJD हेलिकप्टरमा सवार सबै जनाको मृत्यु भएको छ । नेपाल प्रहरीका अनुसार दुर्घटनास्थलबाट १ जना महिला र ४ जना पुरुषको शव निकालिएको छ ।
उक्त हेलिकप्टर क्याप्टेन अरुण मल्लले चलाएका थिए भने अन्य ४ जना चिनियाँ यात्रु थिए । प्रत्यक्षदर्शीका अनुसार उक्त हेलिकप्टर रुखमा ठोक्किएर खोलामा खसेको थियो ।
काठमाण्डौ विमानस्थलबाट स्याफ्रुबेशी ( रसुवा जिल्ला) का लागि ४ जना यात्रु (चिनिया नागरिक) सहित उडान गरेको सो हेलिकप्टर उडान गरेको ३ मिनेट पछि काठमाण्डौ टावरसंग सम्पर्क विच्छेद भएको नागरिक उड्डयन प्राधिकरणले जनाएको छ । प्राधिकरणका अनुसार सो हेलिकप्टर नुवाकोट जिल्ला शिवपुरी गाउँपालिका वडा नं. ७ सुर्याचौर भन्ने स्थानमा दुर्घटनामा परेको हो ।
यहि हेलिकप्टर १५ महिना अगाडी एउटा ठूलो दुर्घटनाबाट जोगिएको थियो । २०७९ चैत्र २५ गते काठमाडौंको ह्याम्स अस्पतालमा उक्त हेलिकप्टर दुर्घटनामा परेको थियो । त्यस समय अस्पतालको छतमा रहेको हेलिप्याडमा अवतरणका क्रममा हेलिकप्टरको पछाडिको पुच्छरको पंखा खुस्किएको थियो । हेलिकप्टरको पंखा नजिकैको घरको छानामा खसेको थियो। त्यस समय हेलिकप्टरको पुच्छरको भाग ठोक्किएर दुर्घटना भएको थियो । घटनामा कोही पनि घाइते नभए पनि हेलिकप्टरको टेल रोटर भने भाँचिएको थियो । ठूलो दुर्घटनाबाट सो हेलिकप्टर जोगिएको थियो ।
