भारत सरकारले चिनीको निकासीमा प्रतिबन्ध लगाएपनि नेपालमा चिनीको अभाव नहुने सरकारले जनाएको छ । उद्योग, वाणिज्य तथा आपूर्ति मन्त्रालयले ८ महिनालाई पुग्ने चिनी मौज्दात रहेको बताएको छ ।
नेपालमा चिनीको सहज आपूर्ति, बजार मूल्यको स्थिरता र आम उपभोक्ताको हित सुनिश्चित गर्न आवश्यक कदम चालिरहेको जनाउँदै मन्त्रालयले नेपाल चिनी उत्पादक संघका पदाधिकारी र सरोकारवाला मन्त्रालय तथा निकायका प्रतिनिधिसँग छलफल गरेपछि चिनीको अभाव नहुने जनाएको हो ।
नेपालमा सञ्चालनमा रहेका उद्योगबाट उत्पादित र मौज्दातमा रहेको चिनी तथा खाद्य व्यवस्था तथा व्यापार कम्पनी लिमिटेड, साल्ट ट्रेडिङ कर्पोरेशन लगायतका निकायहरूसँग हाल ८ महिनाको माग धान्ने चिनीको मौज्दात रहेको मन्त्रालयले जनाएको छ ।
