राष्ट्रिय परीक्षा बोर्ड कर्मचारी यूनियन भङ्ग गरिएको छ। सरकारले शासकीय सुधारको लागि पारित गरेको १०० कार्यसूचीमा यूनियन खारेज गर्ने निर्णय गरेकोले, सो निर्णयको स्वागत गर्दै कर्मचारी आफैले यूनियन भङ्ग गरेका हुन् ।
राष्ट्रिय परीक्षा बोर्ड, कर्मचारी यूनियनका अध्यक्ष राजु ओलियाले आज चैत्र १५ गतेबाट लागु हुने गरि यूनियन भङ्ग गरिएको जानकारी दिएका हुन् । सरकारको निर्णयको स्वागत गर्दै यूनियन भङ्ग गरिएको उनले बताएका छन् ।
नेपाल सरकार, मन्त्रिपरिषद्को मिति २०८२ चैत्र १३ गतेको बैठकबाट स्वीकृत शासकीय सुधार सम्बन्धी एक सय कार्यसूचीहरु मध्ये (ख) को (उल्लेखित प्रशासनिक सुधार, पुनर्संरचना र मितव्ययिता) बुँदा नं. १२ मा यूनियन खारेज गरिने उल्लेख छ ।
सो बुँदामा भनिएको छ ‘सार्वजनिक प्रशासनलाई पूर्णतः राजनीतिक हस्तक्षेपबाट मुक्त गर्दै निष्पक्ष, तटस्थ र नागरिकप्रति उत्तरदायी बनाउने । यस उद्देश्यका लागि निजामती कर्मचारी, शिक्षक, प्राध्यापक तथा सबै राष्ट्रसेवकले कुनै पनि दल, समूह वा स्वार्थ केन्द्रसँगको प्रत्यक्ष वा अप्रत्यक्ष आबद्धताबाट मुक्त भई कार्यसम्पादन गर्न अनिवार्य गर्ने र उल्लङ्घन भएमा प्रचलित कानुनबमोजिम कडाइका साथ विभागीय कारवाही गर्ने । साथै, सार्वजनिक प्रशासनमा दलीय ट्रेड युनियन खारेज गरी अवाञ्छित हस्तक्षेप र अनौपचारिक दबाबको अन्त्य गर्दै निर्णय प्रक्रिया तथा सेवा प्रवाहलाई प्रभावकारी बनाउने । यसका लागि आवश्यक कानुनी व्यवस्था विशेषतः सङ्घीय निजामती सेवा विधेयक ४५ दिनभित्र तर्जुमा गर्ने ।’
