सम्पत्ति शुद्धीकरण अनुसन्धान विभागले तीन जना पूर्वप्रधानमन्त्रीको सम्पत्ति छानबिन प्रक्रिया अघि बढेको छ । पूर्वप्रधानमन्त्रीहरू शेरबहादुर देउवा, केपी शर्मा ओली र पुष्पकमल दाहाल (प्रचण्ड)को सम्पत्ति छानबिन प्रक्रिया अघि बढेको विभाग स्रोतले पुष्टि गरेको छ ।
विभाग स्रोतका अनुसार नेपाल प्रहरीको केन्द्रीय अनुसन्धान ब्यूरो (सीआईबी)लाई विभागले पत्राचार गरेर सम्पत्ति छानबिन गर्न अनुरोध गरेको थियो । त्यसपछि सीआईबीले अनुसन्धान अघि बढाएको हो ।
विभागले विभिन्न उजुरीको अनुसन्धानका लागि सीआईबीलाई पत्राचार गरेको र सोही अनुसार अनुसन्धान प्रक्रिया अघि बढेको बताइएको छ । अनुसन्धानकै लागि आइतबार बिहान कांग्रेस नेता तथा पूर्व उर्जामन्त्री दीपक खड्का पक्राउ परिसकेका छन् ।
विभागले जेन् जी आन्दोलनका क्रममा तीन पूर्व प्रधानमन्त्रीहरुको निवासमा आगजनी हुँदा स्थलगत मुचुल्का उठाएर अनुसन्धान अघि बढाइएको भएपनि अनुसन्धान सुस्त रहेकोमा अहिले तिव्रता दिइएको बताइएको छ ।
