नवगठित सरकारले पूर्वप्रधानमन्त्री शेरबहादुर देउवा र उनकी पत्नी आरजु राणा देउवाको सम्पत्तिमाथि अनुसन्धान अघि बढाएको छ । सम्पत्ति शुद्धीकरण सम्बन्धि अनुसन्धानका लागि सम्पत्ति शुद्धीकरण अनुसन्धान विभागले देउवा परिवारका सदस्यहरुको सम्पत्ति विवरण समेत संकलन गरिसकेको छ ।
जेन जी आन्दोलनका क्रममा आगजनीमा परेको घर भत्काउन लागिएकोमा अहिले घर भत्काउने काम समेत रोक्न लगाइएको छ । प्रमाण नष्ट गर्नसक्ने आशंका गर्दै शम्पत्ति शुद्धीकरण अनुसन्धान विभागले नै बूढानीलकण्ठस्थित देउवाको घर भत्काउने काम रोक लगाएको हो ।
यसैबीच, देउवा परिवार विरुद्ध यसअघि नै सम्पत्ति शुद्धीकरण अनुसन्धान विभागमा उजुरी परेको थियो । तर, अनुसन्धान अघि बढेको थिएन । अब भने यसअघि नै जुटाइएका प्रमाणहरु संकलन गरेर अनुसन्धान अघि बढाउन लागिएको विभाग स्रोतले जनाएको छ ।
स्रोतका अनुसार २ वर्षभित्र मात्रै देउवा पुत्र जयवीरले आफ्ना नातेदार र आफन्तसँग मिलेर करिब ७३ रोपनी जग्गा किनेको विवरण अहिले गृह मन्त्रालयमा आइसकेको छ । यसका साथै, विभिन्न व्यक्तिसँग जयवीरले गरेको कारोबारको विवरण समेत संकलन भइरहेको स्रोतले जनाएको छ ।
