अवरुद्ध बिपी राजमार्ग सञ्चालनमा आएको छ । शुक्रबार साँझदेखि भएको वर्षाका कारण रोशी खोलामा आएको बाढीले अवरुद्ध बनेको बिपी राजमार्गमा सञ्चालनमा आएको हो ।
जिल्ला प्रहरी कार्यालय काभ्रेका अनुसार आइतबार बिहान ६ बजेबाट राजगमार्गमा दुईतर्फी रुपमै यातायात सञ्चालन गरिएको हो । तर, मौसमको प्रतिकूलतालाई ध्यान दिँदै यात्रा गर्न प्रहरीले अनुरोध गरेको छ ।
शुक्रबारदेखि परेको पानीले अस्थायी सडकसमेत बगाएपछि दुई दिनदेखि राजमार्ग अवरुद्ध थियो । रोशी खोलाको बाढीले चौकीडाँडादेखि नेपालथोकसम्म विभिन्न स्थानमा करिब चार किलोमिटर ‘डाइभर्सन’ बगाएको थियो ।
गत वर्ष असोजको बाढीपहिरोले चौकीडाँडा–नेपालथोक सडकखण्ड पूर्ण रूपमा क्षतिग्रस्त बनाएपछि खोलामै अस्थायी सडक बनाएर यातायातका साधन सञ्चालन गर्दै आइएको छ ।
शुक्रबारको बाढी तथा पहिरोले बिरुवाडाँडा, कालढङ्गा, चौकीडाँडा र मङ्गलटारमा बाटो बगाएपछि राजमार्ग अवरुद्ध थियो । प्रहरीले काठमाडौँबाट उक्त राजमार्ग हुँदै चल्ने सवारीलाई काभ्रेभन्ज्याङ र भकुण्डे तथा पूर्वतर्फ नेपालथोक र मङ्गलटारमा सवारी साधन रोकेको थियो ।
