निजी क्षेत्रको दूरसञ्चार सेवा प्रदायक एनसेलको कर्पोरेट कार्यालय अब धापासीमा सर्ने भएको छ । जेन् जी आन्दोलनका क्रममा लैनचौरस्थित कर्पोरेट कार्यालयमा आगजनी भएपछि एनसेल अहिले नख्खुस्थित पूरानै कार्यालयमा सरेको छ । अब धापासीबाट एनसेलले कर्पोरेट कार्यालय सञ्चालनमा ल्याउन लागेको हो ।
धापासीमा व्यवसायी दीपक मल्होत्राले होटल सहेन्सा बनाउनका लागि तयार पारेको भवनमा एनसेल सर्न लागेको हो । यसका लागि दुइ पक्षबीच समझदारी पत्रमा हस्ताक्षर भइसकेको छ । मल्होत्राका अनुसार आगामी साउनबाट एनसेल उक्त भवनमा सर्ने गरी समझदारी भएको छ ।
अब केही दिनमै सम्झौतामा हस्ताक्षर हुनेछ । ‘अहिले एमओयू भएको छ, अब केही दिनमै सम्झौतामा हस्ताक्षर हुन्छ’ मल्होत्राले भने, ‘अवधि र अरु कुराहरु चाहिँ अब एग्रिमेन्टमा नै खुलाइन्छ ।’
मल्होत्राले होटल बनाउने भनेर भवन तयार पारेका थिए । तर, विभिन्न कारणले होटलका रुपमा भवन सञ्चालनमा आउन सकेन । त्यसपछि ट्रेनिङ सेन्टरका रुपमा सञ्चालन गर्नका लागि उनले तयारी अघि बढाएपनि लाइसेन्स लगायतका झन्झटिला प्रक्रियाले गर्दा त्यो पनि सफल भएन । त्यसकारण उक्त भवन खाली नै थियो ।
‘कोभिड, आर्थिक मन्दी लगायतका कारणले होटल पनि सञ्चालनमा ल्याउन सकिएन, त्यसपछि ट्रेनिङ सेन्टर बनाउने भनेर लाग्दा पनि लाइसेन्स लगायतको प्रक्रिया नै सहज भएन’ मल्होत्राले थपे, ‘अब त्यहाँ केही वर्षका लागि एनसेल बस्छ ।’
यसअघि लैनचौरमा एनसेलको कर्पोरेट कार्यालय रहेको भवनमा पनि अब होटल बन्ने भएको छ । यती समूहले १० तल्ले उक्त भवनमा पाँचतारे होटल बनाउन सुरु गरिसकेको छ ।
