नेपाल उद्योग वाणिज्य महासंघका अध्यक्ष चन्द्रप्रसाद ढकालको नेतृत्वमा १० अर्ब रुपैयाँको ‘नेपाल इन्भेष्टमेन्ट कम्पनी’ स्थापना भएको छ । देशभर उद्योगी व्यवसायीहरुको लगानी हुने गरि सामूहिक लगानी कोष मोडलको इन्भेष्टमेन्ट कम्पनी स्थापना भएको हो ।
यो कम्पनीले मुलुकमा ठूला पूर्वाधार आयोजनामा लगानी गर्नेछ । प्रतिफलयुक्त ठूला पूर्वाधार परियोजनाहरुमा लगानी गर्ने उद्देश्यसहित सबै जिल्लाका उद्योगी व्यवसायीहरुको सामूहिक लगानी रहने गरि कम्पनी स्थापना गरिएको महासंघका अध्यक्ष ढकालले बताए ।
यसअघि अध्यक्ष ढकालले महासंघको ढोरपाटमा भएको कार्यसमिति बैठकबाट १० अर्ब रुपैयाँको इन्भेष्टमेन्ट कम्पनी स्थापना गर्ने उद्घोष गरेका थिए ।
नयाँ स्थापित कम्पनीको सञ्चालकमा अध्यक्ष ढकालसहित नेपाल चेम्बर अफ कमर्शका निवर्तमान अध्यक्ष राजेन्द्र मल्ल, नेपाल उद्योग परिसंघका निवर्तमान अध्यक्ष विष्णुकुमार अग्रवाल, नेपाल उद्योग तथा व्यवसायी महासंघका अध्यक्ष भागिरथ सापकोटा र उद्यमी मनोज पौडेल छन् ,
कम्पनीको जारी पूँजी १० अर्ब हुने छ भने १ अर्ब रुपैयाँ चुक्ता पुँजी हुनेछ । कम्पनीले सर्वसाधारण नागरिकमा प्राथमिक सेयर निष्काशन गरेर सर्वसाधारणलाई समेत समेट्ने लक्ष्य लिएको अध्यक्ष ढकालको भनाइ छ ।
