प्रधानमन्त्री केपी शर्मा ओलीले आफू नेतृत्वको सरकारले निजी क्षेत्रको मनोबल बढ्ने र लगानी प्रोत्साहन हुने खालका नीतिहरु अवलम्बन गर्ने बताएका छन् । नेपाल उद्योग वाणिज्य महासंघका पदाधिकारीहरुसँगको भेटमा प्रधानमन्त्री ओलीले निजी क्षेत्रको प्रवद्र्धन र विस्तार नभई मुलुकको उन्नति सम्भव नभएको बताउँदै उद्योगी व्यवसायीलाई सहज हुने नीति सरकारले लिने बताए ।
महासंघका अनुसार प्रधानमन्त्री ओलीले निजी क्षेत्रको सुधारका लागि सरकारले विशेष पहल गर्ने प्रतिवद्धता जनाएका छन् । निजी क्षेत्र बिना अर्थतन्त्र राम्रो हुन नसक्ने र निजी क्षेत्रलाई विस्तार नगरी अर्थतन्त्रमा सुधार आउन नसक्ने बताउँदै प्रधानमन्त्री ओलीले सरकारले उद्यमी तथा व्यवसायीलाई सहयोग गर्न कुनै कसरत बाँकी नराख्ने बताएका छन् ।
उक्त भेटमा उपप्रधानमन्त्री एवं अर्थमन्त्री विष्णु पौडेल पनि उपस्थित थिए ।
भेटमा महासंघका अध्यक्ष चन्द्रप्रसाद ढकालले अहिले निजी क्षेत्रको मनोबल खस्किएको बेला भएकाले मुलुकको अर्थतन्त्रको सुधारका लागि निजी क्षेत्रको मनोबल बढाउनु आवश्यक रहेको बताएका थिए । निजी क्षेत्रको विकास तथा विस्तारबाट मात्रै अर्थतन्त्रमा सुधार ल्याउन सकिने उनको भनाइ छ ।
अध्यक्ष ढकालले उद्यमी व्यवसायीले मर्यादित रुपमा व्यवसाय गर्न पाउने वातावरणको सुनिश्चितता एवं नीतिगत र व्यवहारगत सुधारमामार्फत लगानी अभिवृद्धि गर्न आवश्यक रहेको बताएका छन् । निजी क्षेत्रलाई राज्यको मर्यादा क्रममा समावेश गर्ने लगायतका गैरमौद्रिक प्रोत्साहन आवश्यक रहेको पनि उनको भनाइ छ ।
अध्यक्ष ढकालले आर्थिक वर्षको सुरुमा नै नयाँ सरकार बनेको हुँदा पूँजीगत खर्च बढाउन विशेष पहल आवश्यक रहेको पनि बताएका छन् । उनले अर्थतन्त्र सुधारका लागि प्रधानमन्त्रीकै नेतृत्वमा निजी क्षेत्रको समेत सहभागीता रहने गरि आर्थिक सुधारको कुनै संयन्त्र खडा गर्न आवश्यक रहेको बताएका छन् ।
निर्माण व्यवसायीको भुक्तानी र डेडिकेटेड फिडर एवं ट्रकलाइनसम्बन्धी विवाद तत्काल समाधान गरी उद्यमी व्यवसायीलाई निर्वाध र सहज रुपमा काम गर्नसक्ने वातावरण निर्माण गर्न, सहकारी र लघुवित्तमा देखिएको समस्याका कारण ग्रामीण भेग, साना सहर र साना उद्यमीसम्म रकम पुग्न नसकेको हुँदा त्यहाँ सहज वित्तिय पहुँचका लागि विशेष पहल गर्न पनि महासंघले अनुरोध गरेको छ ।
अध्यक्ष ढकालको नेतृत्वमा रहेको प्रधानमन्त्रीलाई भेट्न गएको महासंघको प्रतिनिधिमण्डलमा निवर्तमान अध्यक्ष शेखर गोल्छासहित वर्तमान कार्यसमितिका पदाधिकारी र सदस्यहरु रहेका थिए ।
