नवनियुक्त उपप्रधान एवम् अर्थमन्त्री विष्णु पौडेलले सेयर बजार अर्थतन्त्रको ऐना भएको बताएका छन् । सोमबार पदभार सम्हाल्दै उपप्रधान तथा अर्थमन्त्री पौडेलले सेयर बजार अर्थतन्त्रको ऐना भएकाले सेयर बजार सम्बन्धि सहज नीतिगत व्यवस्था गर्न आवश्यक रहेको बताएका हुन् ।
पदभार ग्रहण गर्ने क्रममा उनले सेयर बजारलाई सन्तुलित ढंगले अघि बढाउने गरी आफू नेतृत्वको मन्त्रालयले काम गर्ने पनि बताएका छन् । सेयर बजारमा लगानी गर्ने लाखौँ लगानीकर्तामा आत्मविश्वास जगाउने गरी मन्त्रालयले कार्यसम्पादन गर्ने नवनियुक्त उपप्रधानमन्त्री पौडेलको भनाइ छ ।
उनले केही वर्षयता राजनीतिक अस्थिरताका कारण मुलुकको अर्थतन्त्रमा समस्या देखिएको बताउँदै नयाँ गठबन्धन बनेर नयाँ सरकार निर्माण भएकाले अब स्थिरता हुने दाबी समेत गरेका छन् । राजनीतिक अस्थिरताकै कारण आमजनतामा समेत निराशा छाएको र निजी क्षेत्रसहित अर्थतन्त्रका प्रमुख पिल्लरहरुकै आत्मविश्वास टुटेको देखिए पनि अब क्रमशः सुधर हुँदै जाने र नयाँ सरकारले निराशा चिर्दै आशा जगाउने उनको भनाइ छ ।
अर्थमन्त्रीका रुपमा पदभार ग्रहण गर्दै पौडेलले वैकल्पिक वित्तसम्बन्धी कार्यविधि स्वीकृत गरेका छन् ।
