पूर्वसभामुख कृष्ण बहादुर महरालाई सुन्धारा कारागार पठाईएको छ। जिल्ला अदालत काठमाडौंले आज महरालाई मुद्दाको फैसला नहुन्जेलसम्म पूर्पक्षका लागि थुनामा पठाउने आदेश जारी गरेको थियो।
मंगलबार र बुधबार भएको बयान र थुनछेक बहसपछि अदालतले उनलाई थुनामा पठाउने आदेश जारी दिएको हो। बुधबार काठमाडौँ जिल्ला अदालतका न्यायाधीश हर्कबहादुर क्षेत्रीको इजलासले महरालाई अहिले नै निर्दोष रहेको भन्न नमिल्ने रहेकोले थुनामा राख्न आदेश दिएको हो। इजलाशले महरालाई थुनामा राखी मुद्दा पुर्पक्ष गर्न थुनुवा पुर्जी दिई थुनामा राख्नु भनी स्थानीय कारागार कार्यालयमा पठाइदिने आदेश दिएको हो । अदालतको आदेश अनुसार उनलाई सुन्धारास्थित जगन्नाथदेवल केन्द्रीय कारागार पठाईएको छ।
प्रहरीले उनीविरुद्ध ८ करोड ५५ लाख २८ हजार ३७४ रूपैयाँ बिगो र ३ वर्षभन्दा बढी अवधि कैद सजाय माग दाबी गर्दै मुद्दा दायर गरेको थियो । उनीमाथि विद्युतीय चुरोट भेपमा लुकाएर ल्याइएको सुन विमानस्थल भन्सारबाट छुटाउन दबाब दिएको आरोप थियो।
