बीपी राजमार्गमा गाडी चलाउन रोक लगाइएको छ । रोशीखोलामा पानीको सतह बढ्दै गएपछि बीपी राजमार्गमा गाडी चलाउन पूर्ण रुपमा रोक लगाइएको हो ।
काभ्रेका प्रमुख जिल्ला अधिकारी उमेशकुमार ढकालले बीपी राजमार्गमा पर्ने रोशीखोलामा पानीको बहाव बढेको र स–साना खहरेले पहिरो झारेपछि बीपी राजमार्गमा गाडी चलाउन पूर्ण रुपमा रोकिएको बताएका छन् ।
शुक्रबार रातिबाटै रोशीखोलामा पानीको बहाव बढेको छ । जसका कारण बीपी राजमार्ग हुँदै काठमाडौँ र बनेपा तथा धुलिखेलबाट गएका सवारी साधन काभ्रेभन्ज्याङ र आउँदै गरेका सवारी साधन भकुण्डेबेसीमा रोकिएका छन् । सिन्धुली हुँदै उपत्यका र बनेपा तथा धुलिखेलतर्फ आउँदै गरेका सवारी साधन नेपालथोक र खुर्कोटमा रोकिएका छन् । इलाका प्रहरी कार्यालय मंगलटारका प्रमुख प्रहरी निरीक्षक ईश्वर कार्कीका अनुसार पिन्थली, विरुवाडाँडा र माम्तीमा सडक पूर्ण रुपमा अवरुद्द भएको छ ।
