बहालवाला प्रधानमन्त्री लखेटिन्छन्, उनको निजी निवास खरानी बन्छ भनेर कसैले कल्पना गरेको थियो होला ? पूर्व प्रधानमन्त्रीहरु शरणार्थी बन्नुपर्ने दिन आउला भनेर कसैले सोचेको थियो होला ?
सामाजिक सञ्जालमा युवाहरुको आक्रोश ब्याप्त थियो । तर, न बहालवाला प्रधानमन्त्री केपी ओलीले आक्रोशलाई बुझ्न चाहे, न पूर्वप्रधानमन्त्रीहरुले नै उनलाई बुझाउन सके । जसका कारण सामाजिक सञ्जालमा ब्याप्त आक्रोश सडकमा उर्लियो र ठूला राजनीतिक दलका शीर्ष नेताहरुलाई विस्थापित गरिदियो ।
एमाले अध्यक्ष केपी शर्मा ओलीको भक्तपुरस्थित निवास खण्डहर बनेको छ । कांग्रेस सभापति शेरबहादुर देउवाको बुढानीलकण्ठको निजी निवास पनि खरानी बन्यो । माओवादी केन्द्रका अध्यक्ष पुष्पकमल दाहालको ललितपुर खुमलटारस्थित भाडाको घर पनि ध्वस्त बन्यो । चितवनको उनको निवास पनि जल्यो ।
यी दलका शीर्ष तहमा रहेका अन्य नेताहरुको पनि उपत्यका र बाहिरका निवासहरु तोडफोड र आगजनीमा परेका छन् । तर, राजनीतिको केन्द्रमा रहँदै आएका तीन ठूला दलका शीर्ष नेता देउवा, ओली र प्रचण्ड अहिले घरबारबिहीन बनेका छन् । सेनाको सुरक्षा घेराबाट फिर्ता भएपनि उनीहरुको निवास नभएकाले कि डेरा खोज्नुपर्ने अवस्था छ, कि आफन्तकोमा शरण लिनुपर्ने अवस्था छ ।
मूलधारको राजनीतिबाट जबरजस्ती फ्याँकिन लागेका ओली, देउवा र प्रचण्ड राजनीतिक उत्तरार्धमा निवाससमेत गुमाएर शरणार्थी बन्नुपर्ने बाध्यतामा पुगेका छन् । तर, अझै पनि केही समय उनीहरु सार्वजनिक रुपमा देखिन भने सक्ने छैनन् । सकेसम्म अझै केही दिन उनीहरु सेनाकै सुरक्षा घेरामा बसिरहने छन् ।
