नेपाल उद्योग वाणिज्य महासंघका अध्यक्ष चन्द्र ढकालले जेनजी आन्दोलनका क्रममा घुसपैठ हुँदा अक्लपनीय क्षति भएपनि निजी क्षेत्रलाई थोक्ने र आत्तिने सुविधा नभएको बताएका छन् । एक वक्तव्य जारी गर्दै अध्यक्ष ढकालले प्रतिकूलताका बाबजुद सम्हालिएर अघि बढ्नुपर्ने बाहेक अर्को विकल्प नरहेको बताएका हुन् ।
‘नेपाल उद्योग वाणिज्य महासंघको अध्यक्षका हैसियतमा देशभरका उद्योगी, व्यवसायी र उद्यमशील मनहरूलाई एक सन्देश दिन चाहन्छु कि साथीहरू, हामी नआत्तिऔँ, नथाकौं’ उनले भनेका छन्, ‘आजैबाट क्षतिग्रस्त उद्योग–व्यवसायको पुनर्निर्माणमा होमिऔँ । थप लगानी गरी रोजगारी सिर्जनामा लागौँ । हरेक पटक आउने यस्ता चुनौतीहरुलाई मुलुकको आर्थिक सुधारको नयाँ अवसरको रूपमा लिऔँ र अघि बढौँ ।’
उनले अहिलेको कठिन परिस्थितिमा मनोबल कमजोर पार्ने, थाक्ने वा हार्ने सुविधा निजी क्षेत्रलाई नरहेको भन्दै उनले भावी पुस्ताले रोजगारी खोज्दै खाडी र मलेसियाको यात्रा तय गर्न नपर्ने वातावरण बनाउन आवश्यक रहेको बताएका छन् ।
आगोले ईँटा र काठ जलाए पनि हौसला र आत्मबल बाँकी रहेको भन्दै अध्यक्ष ढकालले अहिले लागेको घाउचोटलाई सबै मिलेर पुर्नुपर्ने बताएका छन् ।
